Shfaqja “Rock ’n‘ Roll” e Prishtinës hap sonte Festivalin e Shkupit

PRISHTINË, Kosovë – Festivali ndërkombëtar i teatrit në Shkup do të jetë stacioni i radhës për shfaqjen “Rock ’n‘ Roll”. Teatri Kombëtar i Kosovës ka vendosur që me shfaqjen e regjisorit Dino Mustafiq të jetë pjesë e edicionit të pestë të këtij festivali. Do t’i takojë pikërisht shfaqjes nga Kosova që sonte (e premte) ta hapë festivalin. Për shtatë ditë kryeqyteti maqedonas do të jetë nikoqir i trupave të tjera teatrore nga Bullgaria, Turqia, Serbia, Franca, Polonia, Italia, etj. Ky festival ka karakter garues. “Rock ’n‘ Roll” do t’i lërë vend shfaqjes “Dhoma” nga Italia, që do të shfaqet një ditë pas në kuadër të festivalit. Në një komunikatë për shtyp, Teatri Kombëtar i Kosovës pjesëmarrjen në festivalin e Shkupit e ka cilësuar si njërin nga sukseset e radhës. Shfaqja “Rock ‘n’ Roll” është e bazuar në tekstin e dramaturgut Tom Stoppard, që bazohet në rrëfimin për historinë e komunizmit në Çekosllovaki, në mes të viteve 1968 – 1990. Regjisori Mustafiq atë e ka gërshetuar me rrëfimet personale të aktorëve kosovarë, nga ato që kanë përjetuar gjatë luftës së fundit në Kosovë. Në “Rock..” luajnë Kushtrim Hoxha, Mentor Zymberaj, Gresa Pallaska, Ilire Çelaj, Armend Ismajli, Edona Reshitaj, Adrian Morina, Besnik Krapi, Fisnik Zeqiri, Rebeka Qena, Semira Latifi dhe Fisnik Sykaj. Në shfaqje interpreton live bendi i njohur kosovar “Jericho”.