Hetimi i terrorizmit, pista e re për agjentin esat Çopa

DURRES -Kanë kaluar afro dy javë pas ngjarjes së rëndë të ndodhur në zonën e Currilave në Durrës dhe ende nuk ka një version përfundimtar për vdekjen e oficerit të SHISH-it, Isa Çopa. Ekspertët, të dyzuar nëse rasti është vrasje apo vetëvrasje i janë rikthyer variantit të parë, asaj të një vrasjeje të mundshme të 49-vjeçarit. Të premten ekspertë, agjentë të luftës kundër krimit nga Tirana dhe Durrësi kanë këqyrur edhe një herë vendin ku u gjet i shkrumbuar në makinë oficeri i SHISH-it, Isa Çopa. Ata kanë ndërtuar përsëri skenën e kësaj ngjarjeje, e cila po i mban të ndarë më dysh agjentët e policisë. Pas kryerjes së hetimeve, në tavolinë janë hedhur disa dyshime lidhur me këtë ngjarje, nëse oficeri do të konsiderohet i vrarë. Burime të besueshme pohojnë se gjatë takimit, ekspertët e çështjes kanë diskutuar për një pistë të re, e cila lidh ngjarjen me survejimin e elementëve me prirje terroriste nga ana e viktimës, i cili punonte në sektorin e kundërzbulimit.
HETIMI
E ndërsa pritej raporti i ekspertëve nga Tirana lidhur me ekspertimin anatomik të trupit të oficerit të SHISH-it, Isa Çopa, gjërat duket se janë rikthyer përsëri në pikën fillestare të hetimeve. Drejtori i Drejtorisë së Krimeve të Rënda në policinë e shtetit, Tonin Vocaj së bashku me një grup ekspertësh mbërritën të premten në Durrës. Ata kanë qëndruar për një kohë të gjatë në zonën e Currilave, atje ku u gjend i djegur në makinën e tij oficeri i SHISH-it, Isa Çopa. Burime nga policia bëjnë me dije se ata kanë ndërtuar edhe një herë skemën e ngjarjes. Edhe pse policia e Durrësit vazhdon të këmbëngulë se bëhet fjalë për vetëvrasje, duket se ende ka dyshime se rasti i Çopës mund të jetë vrasje me mjete të forta, çka shtron për hetim një vrasje me mënyra banale larg atyre që aplikojnë killerët profesionistë.
PISTAT
Edhe pse rrethanat e ngjarjes së ndodhur në orët e para të mëngjesit të 25 tetorit janë të mjegullta, burimet nga policia e Durrësit shprehen se specialistët e luftës kundër krimeve nga Tirana po kërkojnë pista të reja hetimi. Të premten ata hodhën në tavolinën e analizës së kësaj ngjarje, një pistë të re. Dyshohet që Isa Çopa mund të jetë vrarë për shkak të detyrës që bënte. Meqenëse se një nga detyrat kryesore të SHISH-it, është survejimi i elementëve islamikë me prirje terroriste dhe njoftimi për aktivitetin e tyre pranë organeve kompetente, agjentët e luftës kundër krimit e kanë hedhur edhe këtë opsion ditën e premte në Durrës. Ndërkaq, mësohet se një ekip me oficerë me përvojë të SHISH-it në Tiranë janë duke hetuar për llogari të tyre, dhe nëse do të arrijnë të zbardhin këtë ngjarje, do t'i ofrojnë dokumentet e tyre pranë grupit hetimor që drejtohet nga organi i prokurorisë. Ndërkohë, po të premten është diskutuar edhe mbi një tjetër pistë hetimi të mundshme, e cila nuk bëhet me dije për shkak të konfidencialitetit që ajo përmban dhe ruajtjes së sekretit hetimor.

(GazetaShqiptare/BalkanWeb)