Spahiu: Rrëfej bisedën me Topin për Aleancën Kuqezi

TIRANË- Aleanca Kuqezi nuk ka vendosur ende nëse do të shndërrohet në një parti politike. Por, kreu i kësaj lëvizjeje, Kreshnik Spahiu, njëherazi nënkryetari i Këshillit të Lartë të Drejtësisë, pohoi dje se nëse AK garon në zgjedhjet parlamentare të 2013-ës, nuk do të bashkëpunojë me opozitën. Kjo sipas Spahiut për faktin se AK-në e mbështesin shumica e shqiptarëve ndaj nuk mund të bëjë aleancë me minoranca.
Ai i bëri këtij deklarata në emisionin “5 pyetjet nga Babaramo” në NEWS 24, ku deklaroi se nuk i shërben asnjë partie politike, as pozitës, as Presidentit dhe as opozitës.
Sipas tij AK është në shërbim të qytetarëve shqiptarë. Spahiu ndërkohë la evazive mundësinë e kthimit të AK-së në një parti politike por ai bën të ditur se përmes platformës së saj do tu kundërvihet politikave servile ndaj serbëve dhe grekëve. “S’ka lidhje shndërrimi i AK-së në një parti nacionaliste, nuk ka lidhje me politikën, ka lidhje me një platformë që u kundërvihet politikave servile ndaj grekëve dhe serbëve. Sot e kësaj dite mund të thuhet gjithçka por askush nuk mund të thotë për një lidhje, ndjesi apo praktika të ngjashme në lidhje me AK në raport me Bamir Topin dhe Edi Ramën. Qëndrimi ynë ka qenë aq kritik sa me Berishën, po aq me Topin dhe Ramën”, - u shpreh Spahiu.
Pyetjes nëse AK-ja do të hyjë në zgjedhjet e përgjithshme të 2013-ës, Kreshik Spahiu iu përgjigj: “Nuk di të hyjë AK-ja në zgjedhje. Çështja e AK nuk është çështje e një personi por i mijëra qytetarëve, është një verdikt i tyre, një ortek, një shumicë shqiptare dhe kam përshtypje se mazhorancat nuk kanë nevojë të bëjnë aleanca me minorancën. Ne na mbështesin shqiptarët dhe AK-ja është një lëvizje popullore”, tha ai. Lidhur me qëndrimin e kreut të shtetit Bamir Topi për përfshirjen e tij në AK, duke qenë se Spahiu njëherësh është numri dy i KLD-së, ai u shpreh se: “Presidenti ka mbajtur një qëndrim zyrtar dhe ka dalë kundër qëndrimit të AK-së për censusin natyrisht që ky është një rast shumë delikat sepse ne kemi dhe disa pozicione kushtetuese.

Në pozicionin e Presidentit ai më ka pyetur për përfshirjen tim në këtë Aleancë. Por përgjigjja ime është se kushdo ka të drejtë të grupohet në çdo organizëm apo shoqatë. Ky është pasioni im dhe më motivon jashtëzakonisht shumë. Askush nga politikanët nuk më thotë se jam nacionalist ndryshe nga qytetarët shqiptarë”, tha Spahiu. Kreu i Aleancës Kuqezi tregoi dhe arsyet e krijimit të kësaj organizate që sipas tij ka mbledhur rreth vetes mijëra shqiptarë.

SPAHIU SHQIPERIA E KOSOVA NE BRUKSEL TE BASHKUAR
Nënkryetari i Këshillit të Lartë të Drejtësisë, njëherësh kreu i Aleancës Kuq e Zi, Kreshnik Spahiu deklaroi sot në mbrëmje në emisionin “5 pyetje nga Babaramo” se shqiptarët do të shkojnë në Bruksel të bashkuar. Ai tha se BE-ja nuk do mund të ndalë dy shtete që kanë vullnetin për tu bashkuar.

“Unë nuk di ndonjë shqiptar që është kundër bashkimit të Shqipërisë me Kosovën. Shqiptarët do të bashkohen para se të bashkohen me Brukselin. Kush shtet do pranojë që shqiptarët të kenë dy vota në BE apo organizata të tjera? Kur dy shtete kanë vullnet për tu bashkuar, nuk ka organizëm që mund ta ndalojë”, komentoi Spahiu.

SPAHIU: UNË FALEM TEK FLAMURI KUQ E ZI
Spahiu i përgjigjet për herë të parë pyetjes se cfarë përfaqëson lëvizja Aleanca Kuq e Zi, dhe a bie ndesh angazhimi i tij si kryetar i saj, me postin e nënkryetarit të KLD-së. Spahiu komentoi se ka zgjedhur të falet tek flamuri Kuq e Zi edhe pse me këtë gjë, sic tha ai vazhdohet të spekulohet në mënyrë të turpshme.

“Akuzë e radhës me të cilën spekulohet në mënyrë të turpshme. Është angazhim qytetar, shoqëror, jo politik, janë përfshirë me mijëra njerëz. Kemi shumë besimtarë që pas orarit zyrtar dikush shkon në meshë për tu falur, dikush në xhami, unë kam zgjedhur të falem tek flamuri Kuq e Zi. Cfarë i intereson kjo politikës shqiptare?”, - tha Spahiu.

ÇESHTJA E ALEANCËS KUQ E ZI E TË GJITHË SHQIPTARËVE
Kreshnik Spahiu theksoi se çeshtja e Aleancës Kuq e Zi është çeshtje e të gjithë shqiptarëve dhe jo çeshtjë aleancash partiake.
"Aleanca ka kontestime si me mazhorancën dhe me opozitën dhe nuk ka nevojë të bëjë aleancë me minorancat. Sot mbështetet nga 80% e shqiptarëve.” – deklaroi Spahiu.

KOSOVA, SHQIPERIA TE KUSHTEZOJE MARREDHENIET ME SERBINE
Spahiu nënvizoi se Aleanca Kuq e Zi kundërshton vendimin për liberalizimin e vizave me Serbinë, në një kohë kur kjo e fundit nuk pranon ta njohë Kosovën dhe vështirëson jetën e qytetarëve në veri të saj.

Sipas kryetarit të Aleancës Kuq e Zi, Shqipëria duhet t’i kushtëzojë marrëdhëniet më Serbinë me njohjen e Kosovës dhe largimin e barrikadave nga veriu i Mitrovicës.
“Mitrovica është zemra e pasurisë kombëtare shqiptare dhe askush nuk duhet të bëjë pazare me të. Nuk duhet të gjunjëzohemi përpara diplomacisë greke dhe asaj serbe”-tha Spahiu.

SPAHIU: DREJTËSIA SHQIPTARE E KORRUPTUAR
Kreu i KLD-së flet edhe për problemet që shqetësojnë sot drejtësinë shqiptare. Spahiu deklaroi se drejtësia është e korruptuar, ndërsa shtoi se KLD nuk ka kompetenca për ta luftuar korrupsionin.
"Drejtësia e koruptuar sepse Shqipëria është e korruptuar. Këshilli i Lartë i Drejtësisë fatkeqësisht nuk e ka kompetencën për të kontrolluar, monitoruar gjyqtarët. Merret me propozimet, transferimet e gjyqtarëve. Organi i akuzës merret me korrupsionin. Dëshiroja shumë ta kishte këtë kompetencë, por nuk e kemi”, deklaroi Spahiu.
Numri dy i KLD-së deklaroi më tej se problem për drejtësinë, mbetet edhe cështja e zyrtarëve me imunitet. “Në mes të këtij bataku kemi njerëz me imunitet, ashtu si gjyqtarët, deputetët”, tha ai.
Spahiu tha më tej se KLD e ka përmbushur misionin e saj, pasi sic tha ai “KLD i vetmi institucion që në raportin e progresit përmbushi rekomandimet e Komisionit Evropian”.
Në problemet e drejtësisë, Spahiu përmendi edhe krizën politike, e cila ka bllokuar reformat. “Konflikti mes qeverisë dhe maxhorancës ku për 2 vjet e gjysmë kanë bllokuar reformat në gjyqësor, në drejtësi. Nuk përfiton dot asnjë ndryshim, përmirësim të strukturës, apo pr/ligje”, theksoi ai.

MANDATI I JONUZIT, NE PERPUTHJE ME LIGJIN
I pyetur rreth debatit për shtyrjen e mandatit për gjyqtaren e Kolegjit Zgjedhor, Sazhenka Jonuzi, nënkryetari i KLD-së tha se akuzat për këtë çështje tregojnë trysninë dhe presionin që ushtrohet nga politika ndaj institucionit të KLD-së.

“Ndjej keqardhje që KLD-ja vendoset shpesh herë nën trysninë dhe goditjet e politikës shqiptare, si nga të majtët ashtu edhe nga të djathtët”- u shpreh Spahiu.
Sipas Spahiut, vendimi për shtyrjen e mandatit të gjyqtares Jonuzi u mor në përputhje me kodin zgjedhor, i cili është miratuar me konsensus nga opozita dhe mazhoranca.

(m. Arapi/E. Nurcelli/BalkanWeb)