Rinas, aksidentohet makina e eskortës së Berishës

Një aksident i lehtë, ku është përfshirë një nga makinat e togës shoqëruese të kryeministrit Sali Berisha, u regjistrua në afërsi të Rinasit në Tiranë.

Nga informacionet paraprake, mësohet se makina, e radhitur në fund të eskortës së kryeministrit, ka humbur kontrollin dhe ka përfunduar në kanalet anësore të rrugës.

Nga aksidenti është lënduar lehtë drejtuesi i mjetit, që mendohet se është pjesë e truprojave të kryeministrit. Ai është shoqëruar në spital për të marrë mjekimet e duhura.

Nuk ka detaje në lidhje me shkaqet që cuan në aksidentin, që fatmirësisht u mbyll pa pasoja të rënda.