Meksikë, ushtarët bllokojnë 15.3 mln USD

Ushtarët në Meksikë bllokuan 15.3 milion dollarë në një makinë gjatë një kontrolli të rastit në një postbllok në veri të vendit.

Autoritetet thanë se përvec parave janë kapur edhe 3 kilogram kokainë dhe 3 armë zjarri. Ngarkesa e sekuestruar mendohet se i përket Joaquin Guzman, kreu i kartelit të drogës së Sinaloas dhe njeriu më i kërkuar nga Shtetet e Bashkuara dhe Meksika.

Paratë kishin si destinacion një shtëpi të Guzmanit në shtetin e Tijuanës, në kufi me Shtetet e Bashkuara.

Kjo është sasia e dytë e parave të sekuestruar që pas ardhjes së Calderon në krye të Meksikës. Në vitin 2008, gjatë një operacioni në një nga pronat e Guzman, autoritetet meksikane sekuestruan 26 milion dollarë.

Calderon u zgjodh si presidenti i Meksikës me premtimin e luftës së ashpër ndaj trafikut të drogës. Pak pas marrjes së mandatit ai dërgoi ushtrinë për të luftuar kartelet, lufta kundër të cilëve u ka marrë jetën të paktën 40 mijë personave në vitet e fundit.

Një goditje e rëndë për presidentin Calderon dhe autoritetet që po godasin fuqimisht kartelet e drogës në veri të vendit, ishte vdekja e Ministrit të Brendshëm në një aksident ajror me helikopter në Meksiko pak ditë më parë. Por operacioni i fundit tregon se vdekja e Ministrit të Brendshëm, edhe pse ishte krahu i djathtë i Calderon, nuk ka zbehur luftën kundër trafikantëve të drogës.