Kriza, ndërtuesit: Paguani dy apartamente, merrni tre

KORCE – “Kush blen apo gjen klientë për të blerë dy apartamente, përfiton një hyrje falas!". Kjo është oferta e re që kanë nisur të aplikojnë disa ndërtues në qytetet Korçë e Pogradec, të ndodhur përballë uljes së ndjeshme të shitjeve dhe stokut në rritje të apartamenteve. "Përballë pasojave të krizës, kërkesave për blerje nga klientët përherë në ulje, ne jemi të detyruar të ulim vlerën e apartamenteve pothuaj në koston e ndërtimit, e njëkohësisht të gjejmë mënyra të tjera për të frenuar stokun e objekteve. Po përballemi me një situatë tepër të vështirë dhe po shkojmë drejt falimentimit",- pohon Dashamir Purba, një nga ndërtuesit vendas.

POGRADEC
Sipas statistikave të përafërta, apartamentet stok në qytetin e Pogradecit janë kryesisht në zonën buzë liqenit. "Nuk ka një shifër të saktë, pasi ndërtime ka vazhdimisht, ndonëse shitjet janë të pakta. Por vetëm në Pogradec numri i apartamenteve të pashitura është rreth 1500. Sipas situatës, mendohet që në të ardhmen, ky numër të vazhdoj të rritet",- shton ndërtuesi Purba.

KORÇË
Burime për "Gazeta Shqiptare" konfirmojnë se e njëjta situatë është dhe në qytetin e Korçës. I njëjti burim shton se "gjatë muajve të fundit, për shkak të krizës, numri i apartamenteve të shitura pothuaj numërohet me gishtat e dorës". Mësohet se në qytetin e Korçës, numri i apartamenteve të mbetura stok është më shumë se 1000. Blloqet e pallateve janë kryesisht në lagjet periferike, por ka dhe afër qendrës së qytetit. Ndërtuesit pohojnë se stoku i apartamenteve për shkak të krizës e mungesës së fuqisë blerëse, po e vë në vështirësi ekstreme biznesin e tyre, veçanërisht në shlyerjen e kredive dhe të tretëve.
(shkrimin e plote mund ta lexoni sot ne Gazeta Shqiptare)
(er.nu/GSH/BalkanWeb)