Promovohet libri “Gjergj Kastrioti Skënderbeu, Kryqtari i fundit”

Vlorë – Në mjediset e bibliotekës “Nermin Vlora Falaschi” të Universitetit “Ismail Qemali” të Vlorës u promovua sot libri “Gjergj Kastrioti Skënderbeu-Kryqtari i fundit”, me autor gazetarin Virgjil Kule.

Sipas autorit, libri është një monografi historike për një periudhë dhe figurë të larguar në kohë, por aq të afërt dhe të pranishëm sot, veçanërisht për mesazhet e shumta që ai përcjell.

Ky libër, në dallim nga mjaft vepra të tjera me natyrë të mirëfilltë historike, synon të sjellë imazhin dhe figurën e Heroit tonë Kombëtar, në një këndvështrim bashkëkohor, sipas metodologjisë moderne.

Në çdo faqe të këtij libri, Skënderbeu vjen ashtu siç nuk e njohim, me të gjitha dimensionet e Heroit tonë Kombëtar.

Autori në këtë libër del jashtë klisheve të historiografisë së periudhës komuniste, duke na dhënë një figurë ashtu siç duhet ta shohim dhe për të cilin, siç shprehet, Kule, “vendi ynë sot duhet të këmbëngulë për ta shenjtëruar”.

Kule ka shfrytëzuar dokumenta të shumta dhe të reja, të panjohura më parë, të papërdorura deri më sot, duke udhëtuar shtet më shtet, atje ku i duhej për realizimin e synimit, duke sjellë për publikun me gjithë dritë-hijet sagën skënderbejane.

Duke dhënë gjithë gamën e problematikës që ndodh në përditshmërinë e dokumentuar sipas kriterit kronologjik, duke gërshetuar metodat bashkëkohore në kohë dhe hapësirë me linjën e arsyetimit, autori ravijëzon Skënderbeun që diti të harmonizohej me rrjedhën e ngjarjeve, me zgjuarsinë e tij të lindur e të kultivuar, me intuitën fenomenale për të qenë gjithmonë në krahun e fituesit, si një partner me të drejta të plota në Frontin Kishtar Evropian, si një aleancë ushtarake e ekonomike në kryqëzatën anti-osmane, duke u njohur si komandanti i saj.

Autori e trajton Skënderbeun jo si të krishterin e fundit, por kryqtarin e fundit, sepse Gjergj Kastrioti, qe palë me më të mëdhenjtë e kohës, Vatikanin aleat dhe kundërshtar me perandorinë më të madhe të kohës, atë osmane.

Kule ravijëzon Skënderbeun si strateg të jashtëzakonshëm, por po aq edhe politikan të përmasave më të mëdha të kohës, një shembull që duhet të ndiqet në aspiratën tonë të integrimit evropian.

Në ceremoninë e organizuar me këtë rast në mjediset e Bibliotekës së Universitetit “Ismail Qemali” të Vlorës, ishin të pranishëm studiues, historianë, studentë e pedagogë, qytetarë.