Dy filma për të drejtat e grave triumfojnë në “Një botë”

Rrëfimi i një grupi grash indiane që formojnë bandën e tyre për t’i mbrojtur të drejtat e tyre dhe historia e një vajze të re që sjell në jetë dhe rrit foshnjën e saj, janë zgjedhur dy filmat më të mirë për drejtat e njeriut. Të dy historitë e përthekuara në filmat “Pink Gang” dhe “Karla’s Arrival” janë dy filmat që kanë fituar në edicionin e 11-të të Festivalit Ndërkombëtar të Filmit Ndërkombëtar për të Drejtat e Njeriut “Një botë”, që u mbyll të premten mbrëma me ndarjen e çmimeve.

Regjisori Enrico Bisi, i cili ka realizuar dokumentarin për “bandën rozë”, ka thënë se ndihet i nderuar për këtë çmim.

Kryetari i jurisë së festivalit, Vehap Shita ka thënë se këtë vit cilësia e filmave ka bërë që çmimin e jurisë ta ndajnë dy filma. I dyti që ka marrë këtë çmim ka qenë filmi i regjisorit Koen Suidgeest.

Në një ceremoni të thjeshtë me pak publik të interesuar, organizatorët kanë ndarë një mirënjohje speciale për regjisorin shqiptar që jeton në Itali, Erion Kadilli. Filmi i tij “I’ve Been God in Bosnia” sjell rrëfimin e një mercenari gjatë luftërave në Kroaci dhe Bosnjë, që ka qenë gjithashtu në konkurrencën zyrtare.