Zbulimi: Pse dimri u egërsua këtë vit në Evropë

Potsdam, 20 shkurt, NOA - I ftohti intensiv i këtyre ditëve në mbarë Evropën, mund të jetë shkaktuar nga ulja e nivelit të akullit polar.

Në këtë përfundim kanë arritur disa hulumtues në universitetin e Potsdamit, sipas të cilëve, tërheqja e akullit që mbulon Polin e Veriut do të ndryshojë edhe presionin e Arktikut me një rikthim shumë të fortë mbi dimrin evropian.

Hulumtuesit e Njësisë së Kërkimeve të Institutit për Kërkime Polare dhe Detare pranë këtij universiteti, pohuan mes të tjerash se nëse ka një shkrirje dhe rënie të bollshme të nivelit të akullit në Polin e Veriut gjatë verës, si ajo që ndodhi në vitet e fundit, kjo shoqërohet me dy pasoja të rëndësishme.

E para, është mbajtja e një niveli të konsiderueshëm të ngrohjes globale. Ndërsa e dyta, është ajo e çlirimit të nxehtësisë në atmosferë nga oqeani.

"Këto temperatura të larta, mund të shkaktojnë ndryshimin në rrymat e oqeanit në afërsi të Arktikut", shpjegon Ralf Jaiser, ndër autorët e studimit.
Duke sqaruar më tej, se ngrohja e ajrit pranë detit përcakton proceset e bërjes më pak të qëndrueshme të atmosferës.

Kjo situatë sipas tij, ka bërë që të formohen erëra të forta perëndimore në dimër, të cilat sjellin lagështi dhe ftohtësi në Evropë.

Po e ardhmja? Çfarë mund të presim? Sipas ekspertëve, të ardhmen dimri do të jetë gjithnjë e më i ftohtë, situatë e cila do të përsëritet sërish në vitet e ardhshme.

e.t/NOA

Zbulim teper i rendesishem.