Shoqata Shqiptaro-Izraelite kërkon gjyq për botuesin e “Mein Kampf”

Lajmi për botimin në shqip të librit “Mein Kampf” të Adolf Hitlerit, ka nxitur edhe reagimin e Shoqatës së Miqësisë Shqiptaro-Izraelite. Historiani Apostol Kotani, me pretendimin se ky libër fyen marrëdhëniet e mira të shqiptareve me hebrenjtë, deklaron se kryesia e kësaj shoqate po diskuton dërgimin e çështjes në gjykatë.

”Boshllëku ligjor bën që vetëm një padi në prokurori, që në këtë rast mund ta bëjë shoqata e miqësisë Shqipëri-Izrael, mund ta ndalojë shitjen e librit, gjithmonë se vendimi gjyqësor është i tillë”, raportojnë mediat shqiptare.

Në anën tjetër, Zyra për të drejtat e autorit e Shqipërisë, pohon se do të gjobisë botuesin e librit, pasi vepra nuk është regjistruar për të drejtat e autorit. “Por kjo Zyrë nuk mund të shkojë më tej pasi nuk e ka të drejtën e konfiskimit”, raportojnë mediat vendore.

Debati për botimin e këtij libri në shqip, ka nisur në fund të javës që shkoi pas lajmit se vepra në shqip e Hitlerit - e ndaluar në disa vende të botës - ka zënë vend në libraritë e Shqipërisë.

Ermir Nika, ka thënë se “Ministria e Turizmit, e Kulturës, e Rinisë dhe e Sporteve përgjigjet vetëm për librat artistikë apo albanologjikë.

“Ndërsa “Mein Kampf” është një traktat i mirëfilltë politik. Është e vërtetë që tek ne është e garantuar liria e shtypit dhe ky është një botim privat, por botuesin e këtij libri e kap neni 265 i Kodit Penal të Shqipërisë”, ka thënë Nika. Sipas tij, jo shumë kohë më parë, një rast i ngjashëm ka ndodhur edhe në Çeki dhe botuesi është penalizuar me heqje lirie. Por sipas tij ndalimi i qarkullimit mund të bëhet vetëm me një vendim gjykate të formës së prerë. Por, për të arritur deri këtu, duhet ngritur një padi, e këtë të nuk mund ta ngrejë as Ministria e Kulturës.

Shtëpia botuese që e ka hedhur në treg këtë libër është identifikuar si “Belina H”, e cila sipas MTKRS-së nuk figuron të jetë regjistruar tek institucioni përkatës.

Për botuesin e librit të Hitlerit, Beqir Haluli, “Mein Kampf është një libër krejt i parrezikshëm”.

“Për ne është më i rrezikshëm Enveri e Stalini, sepse varet edhe nga libri që i boton. Libri është botuar në të gjitha vendet e botës, vetëm në Gjermani përbën ende problem, për shkak të organizatave neonaziste”, ka thënë ai.

Në fakt ribotimi i këtij libri është i ndaluar në Gjermani, pasi mendohet se ai mund të nxisë urrejtje. Ky mendim është rrëzuar nga një pjesë e kritikëve. “Mein Kampf” është renditur ndër 10 librat që tronditën botën nga revista online “Listeverse”. Botimi i “Mein Kampf” mbetet debat i vazhdueshëm në shumë vende të botës, derisa në një pjesë të Evropës dhe në ShBA ai lejohet të publikohet. Në vende si Suedia ka norma që rregullojnë shpërndarjen e tij.

Libri i liderit nazist që nxiti Luftën e Dytë Botërore, trajton në thelb superioritetin e racës ariane dhe urrejtjen për popullin hebraik, që në atë periudhë mbante jo pak poste të rëndësishme në administratën gjermane.

“Lufta ime”, konsiderohet si traktat politik i Hitlerit, i gërshetuar me elemente autobiografike, i botuar për herë të parë në vitin 1925. Për “Mein Kampf” thuhet se farkëtoi tërësinë e ideve mbi nacionalizmin, pangjermanizmin, racizmin dhe solli holokaustin. Diktatori e kishte shkruar librin e tij në kohën kur ndodhej në burg, pas një tentative të dështuar për të rrëzuar Qeverinë gjermane në vitin 1924./knninfo/

po ce ke jeni duke e gjetur.