Opozita: Seanca e jashtëzakonshme për veriun e ka humbur urgjencën

Prishtinë, 14 prill - Seanca e jashtëzakonshme për veriun, për disa parti opozitare e ka humbur urgjencën, që e kishte më herët, ndërsa grumbullimi i nënshkrimeve nga grupi parlamentar i PDK-së, pas dështimit të “Vetëvendosjes”, ishte lojë politike. Pa një rezolutë të gatshme, grupi parlamentar i PDK-së, ka bërë nënshkrimet e nevojshme për seancën e jashtëzakonshme, që pritet të mbahet të mërkurën, raporton KTV.

E mërkura e javës së ardhshme kur është paraparë të mbahet një seancë e jashtëzakonshme për veriun, nuk e ka kuptimin e urgjencës.

Lëvizja “Vetëvendosje” që pati kërkuar me ngulm një seancë të tillë për këtë javë, por që nuk ia doli t’i mblidhte nënshkrimet e nevojshme, thotë se seanca e së mërkurës është e vonuar.

Visar Ymeri, shef i Grupit parlamentar të “Vetëvendosjes”, shprehet se ajo që bëri PDK-ja dje me nënshkrimet për një seancë është lojë politike, duke kujtuar përvojat e mëhershme me partinë më të madhe në pushtet.

Ndërkaq, e sheh si papërgjegjshmëri të kryeministrit Thaçi, faktin që nuk e ndërpreu vizitën në SHBA.

Në Lidhjen Demokratike të Kosovës, që kishin vënë si kusht praninë e kryeministrit Thaçi për të përkrahur kërkesën, thonë do jenë prezentë në seancë, por s’do nënshkruhen në listën e PDK-së.

Ismet Beqiri, shef i Grupit parlamentar, thotë se megjithatë, nuk është mungesa e kompetencave, ajo që e ka penguar Qeverinë të ndërmerrte veprime për veriun e Kosovës, por janë treguar të papërgjegjshëm.



Grupi parlamentar i AAK-së, që pa kryeministrin Thaçi nuk kanë dashur të mbanin seancën, pret që të ketë rezultate konkrete nga seanca.

Iniciativa për një seancë të jashtëzakonshme ishte marrë gjatë javës nga lëvizja “Vetëvendosje”, e cila pasi që nuk arriti të mblidhte nënshkrimet edhe protestoi në Kuvend, duke kërkuar me çdo kusht mbajtjen e seancës.

Ndërkohë, 2 ditë pas kësaj partia në pushtet, PDK-ja mblodhi nënshkrimet e nevojshme për të konvokuar një seancë të jashtëzakonshme.

Ajo do mbahet javën e ardhshme.

veriun e shkrete e mori lumi