Çikago, monedha e shekullit të 18 në ankand

Ankandi publik që u mbajt javën e kaluar në shtëpinë “Heritixh” në periferi të Çikagos, tregoi se një monedhë prej 1 centi mund të vlejë më shumë se një milion dollarë amerikanë.

Gjithsesi, kusht për këtë është që monedha të jetë e prodhuar në fund të shekullit të 18-të. Monedhën e çmuar e blenë një grup anonim investitorësh nga Kalifornia përmes përfaqësuesit të tyre në Çikago.

Monedha ishte prodhuar në vitin 1792, kurse në punimin e saj është përdorur bakër dhe argjend. Sikurse edhe monedhat moderne, edhe në të dallohet ana e përparme dhe ajo e pasme. Përpara vërehet vlera e monedhës, ndërsa nga ana tjetër është shtypur vula e simbolit amerikan të lirisë, “Miss Liberti”.

Drejtori i shtëpisë së ankandit Tod Imhof, pas përfundimit të ankandit njoftoi se në mbarë botën ka vetëm 14 ekzemplarë të tillë. Kjo monedhë, thonë ekspertët, kurrë nuk është vënë në përdorim, kështu që është në një gjendje mjaft të ruajtur. Herën e fundit monedha e njëjtë ishte shitur në vitin 1974-të me një çmim prej 105 mijë dollarë.

qenka monedh e lezetshme