“Bashkëshorti s’ ngopej, kënaqej kur më rrihte”

Kam jetuar ferrin për vite të tëra. Ish-bashkëshorti nisi të më rrihte pak muaj pas martese. Ai nuk ngopej, përkundrazi, kishte kënaqësi kur më dhunonte. Kur më humbi durimi e denoncova dhe u divorcova me të. Tani jam e lirë, por kam 4 fëmijë për të rritur dhe as shteti e as privatët nuk më marrin në punë. Askush nuk e vë dorën në zemër”. Kështu u shpreh dje, Remzie Mena (Kalia). 34-vjeçarja nga Rrushbulli pohon se është ndihmuar nga presidentja e Forumit të Gruas në Elbasan, Shpresa Banja. Ajo kërkon ndihmën e shtetit që të rrisë fëmijët e saj. Ndërkohë, Teuta Hoxha, juriste e këtij forumi bën me dije se gjatë 4 muajve të parë të këtij viti janë dhunuar 204 gra në të gjithë Rajonin e Elbasanit. “Gazeta Shqiptare” ka mundur të marrë një intervistë nga gruaja e dhunuar, e cila rrëfen momente të tmerrshme të jetës së saj.
Si ndodhi që marrëdhëniet tuaja me ish-bashkëshortin u përkeqësuan?
As që e kisha menduar ndonjëherë se mes nesh do të kishte grindje e jo më të përjetoja mbi shpinë dhunën shtazarake të tij. Vuajtjet dhe sjellja bastarde e tij nuk mund të tregohen me fjalë. Jam përpjekur gjithmonë në jetë të punoj e të respektoj këdo. Pra, dua të them se për burrin dhe fëmijët e mi kam qenë e papërtueshme dhe e gatshme të bëj sakrifica të jashtëzakonshme që mund të bëjë një grua. Nuk kam lënë kurrë shkak për keq keqkuptime apo për ndonjë gjë tjetër. Nuk e di shkakun e sjelljes së dhunshme të ish- bashkëshortit tim.
U martuat me dashuri apo me mblesëri?
Ishte martesë e natyrshme.
Jeni përpjekur që t’i zbusnit marrëdhëniet në çift?
Kam bërë të pamundurën e të pamundurës, por pa sukses. Edhe pse sjellja e puna ime ishte e shkëlqyer, ai sërish më dhunonte.
Në çfarë forme ushtronte dhunë ish-bashkëshorti juaj?
Në të gjitha format e saj; dhunë psikologjike e dhunë verbale. Por më e keqja ishte se ish-bashkëshorti im filloi të më dhunonte fizikisht që në muajt e parë pas martese. Dhuna erdhi dhe u bë sistematike dhe mori rrugë pa kthim. Nuk ngopej nga dhunimi fizik dhe kjo filloi t’i sillte kënaqësi atij, ndërsa mua m’u kthye jeta në ferr.
A e denoncuat burrin, kur nisi dhunën ndaj jush?
Kam qenë e turpshme dhe e kisha jashtëzakonisht të vështirë të denoncoja tim shoq në vitet e para të martesës. Thjesht qaja për fatin tim të zi. Kjo zgjati deri atëherë kur më shteruan forcat për ta përballuar dhunën fizike. Ishte një vendim i tmerrshëm kur mendoj se sa e paragjykoja veten për të mbrojtur të drejtat e mia. Gjithsesi, falë Zotit kam mbijetuar.
Si ndiheni tashmë që jeni e lirë?
Kam 2 vjet që kam shpëtuar nga ditët e tmerrshme, të cilat fillonin e mbaronin vetëm me dhunë. Nuk dua ta kujtoj më atë kohë, por sërish kam probleme.
Cilat janë problemet me të cilat përballeni aktualisht?
Jetoj së bashku me 4 fëmijët përkohësisht në një ambient me qira të siguruar nga Forumi i Gruas. Por, ndërsa i kam shpëtuar dhunës fizike, tani më duhet të përballoj sfidën e rritjes së fëmijëve, mungesën e strehimit dhe papunësinë. Fëmijët i kam në shkollë dhe vetë jam e papunë. Jam në pikë të hallit. Ne grave të dhunuara nuk na merr as shteti dhe as privati në punë.

sa budallen j jan keta meshkujt e sotshem