Një apel për Familjen

Bujar Cani

Shqiptarë mos braktisni prindërit e mos shkatërroni familjet . Familja është gjëja më e shenjtë që kemi ne. Dihet që shqiptarët emigruan masivisht mbas viteve " 90" , drejt Evropës e vendeve të tjera të botës , për një jetë më të mirë e më të begatë . Ëndrrat e tyre u bënë realitet mbas 50 viteve pritje , por jo çdo gjë ishte e mirë, e mrekullueshme, parajsë e vërtetë për të jetuar . Kishte edhe atje plagë të rënda shoqërore, që kishin prekur këto vende, siç ishin droga, prostitucioni,krimi e të tjera fenomene negative. Por ajo që më bëri më tepër përshtypje, kur unë vajta në Gjermani, në këtë vend ku megjithë mend dora e njeriut kishte bërë mrekulli, ishte se më binte shpesh të shkoja nëpër shtëpi e familje gjermane ku shikoja vetëm pleq. Kudo pleq të vetmuar, nuk shikoje fëmijë të rritur, se për fëmijë të vegjël nuk bëhej fjalë fare. Nuk kishte hare e cicërima fëmijësh, vetëm një qetësi e heshtje varri, fytyra të mplakura, të ngrira e pa asnjë shenjë gëzimi e lumturie në shpirtin e tyre . Bile më kujtohet një rast në një familje gjermane, kur u thashë se jetoja me prindërit e mi dhe familjen time, më panë të habitur, sikur vija nga një planet tjetër . Por nuk do ta harroj edhe porosinë e amanetin që me lanë : Mos i braktisni prindërit, mbajeni e ruajeni këtë traditë mjaft të bukur që keni, sepse po e humbët, si ne keni për të përfunduar. Tashti kur shikoj mbas 20 vitesh demokraci e emigrim, vërej se kjo plagë e rëndë dhe e madhe, ka prekur edhe shoqërinë e familjet shqiptare. Shikoni tashti familjet shqiptare, kudo sheh pleq të vetmuar , sepse fëmijët i kanë braktisur kudo, dëgjon ndarje, divorce familjare, fëmijë të braktisur nëpër dyer të materniteteve e befotrofeve . Ç’po ndodh kështu? Ku po shkojmë? Shqiptarë mos i braktisni prindërit, prindër mos shkatërroni familjet e braktisni fëmijët! Mos krijoni probleme sociale për to, se vjen një dit , që edhe ju do të shpërbleheni me të njëjtën monedhë. Në këto çaste që po shkruaj , më kujtohen prindërit e mi, që kanë shumë vite që kanë ikur nga kjo jetë... /GazetaSh/

shkrim interesant....

Interesante.