Milan barazon, tërbohet Berluskoni

nga mister.albania Wed 31 Oct 2012 - 10:07

Një gol i Montolivos dhe një tjetër i El Sharauit kanë shpëtuar Milanin nga humbja e radhës në Serinë A.

Mbrëmjen e së martës, Palermo-Milan ishte ndeshja hapëse e javës së 10-të e më të mirëve të kampionatit italian të futbollit. Vendasit kaluan në avantazh në sekondat shtesë të pjesë së parë falë një penalltie të shndërruar në gol nga Mikoli. Për t’u përmendur në këtë fraksion loje, ishte një episod i ndodhur në zonën e siçilianëve ku kuqezinjtë pretenduan 11-metërsh.

Pjesa e dytë nis si mos më keq për kuqezinjtë e Alegrit. Brenda pak minutave skuadra e tij pëson edhe golin e dytë dhe këtë herë autori është Brienza. I ndodhur në disavantazh e dy golave, Milani mundohet të reagojë dhe përgjigjja e parë mbërrin në minutën e 69, kur Montolivo shkurton diferencën në 2-1.

11 minuta më vonë është El Sharaui, i vetmi që po shkëlqen në këtë periudhë krize tek Milani, që shënon rrjetën e barazimit 2-2. Ky ishte goli i shtatë i 20-vjeçarit në këtë sezon që e ngjit në krye të listës së golashënuesve të Serisë A.

Allegri i shpëtoi humbjes, por jo tërbimit të Berluskonit. Galliani, i qetësuar pas golit të barazimit, merr një telefonatë (besohet se ishte numri një kuqezi) dhe menjëherë ndryshon humor. Nga ajo që është biseduar, sipas mediave italiane, duket se Berluskoni ka shprehur pakënaqësinë për ndërrimin e shpeshtë dhe të padobishëm të modulit të lojës.

Episodi vë në dyshim të ardhmen e Allegrit në krye të Milanit, megjithatë administratori i deleguar, Galliani theksoi se nuk do të merret asnjë masë ndaj trajnerit Allegri…të paktën për momentin.
http://www.top-channel.tv/images/logo.png