Prishtina barazon me Otrantin

nga Li12i-GG ARMY Fri 26 Feb 2010 - 1:40

Kampionia në fuqi e Kosovës në futboll, Prishtina të enjten ka zhvilluar edhe një ndeshje përgatitore me Otrantin e Ulqinit, ku edhe është duke i zhvilluar përgatitjet para fillimit pranveror. Ndeshja përfundoi me rezultat të barabartë, 1:1. Për ekipin prishtinas realizoi Astrit Fazliu. Në të vërtetë, Prishtina të enjten është dashur të luante me Jedinstvon e Bjellopoljes, por kjo skuadër në çastet e fundit hoqi dorë nga ndeshja për shkak të motit të lig. "Ndeshja me Otrantin u zhvillua në fushë të vështirë. Shtabi teknik është i kënaqur me paraqitjen e skuadrës. Të premten skuadra zhvillon dy stërvitje, ndërsa të shtunën luan në Shkodër me Vllazninë. Takimi ka karakter bamirësie", ka njoftuar drejtori i Prishtinës, Edmond Rugova. Me Otrantin, që bën gara në kategorinë e dytë malaziase, Prishtina kishte luajtur edhe para disa ditësh, kishte fituar 2:0. Me rezultat 3:1 ekipi i kaltër ka mposhtur Barin, ndërsa të mërkurën humbi 2:1 nga Mornari i Tivarit.