Topçinjtë të butë për kampionin

Topçinjtë të butë për kampionin

Manchester City ka mbajtur hapin me liderin Manchester United duke fituar derbin e dytë të javës së 22-të në Ligën Premier. Kampioni i Anglisë e ka mposhtur Arsenalin në Emirates me rezultat 2-0.
Vendasit e filluan keq takimin, pasi Laurent Koscielny ndërhyri në Edin Dzekon, për t’u përjashtuar me karton të kuq dhe duke shkaktuar penalti (10’), edhe pse vendimi i gjyqtarit lë vend për të debatuar.

Sidoqoftë, boshnjaku nuk arriti të shënojë nga pika e bardhë, pasi goditjen e tij e mbrojti portieri Wojciech Szczesny.

Mirëpo, James Milner heshti tifozët në Emiratës duke i kaluar mysafirët në epërsi pas asistimit të Carlos Tevez (21’).

Dzeko përmirësoi gabimin e tij duke e dyfishuar rezultatin (32’), ndërsa edhe në këtë gol ishin të përfshirë Milner dhe Tevez.

Pjesa e dytë u përshkua me raste nga të dyja palët, ndërsa me kalimin e minutave tensioni gjithnjë e më shumë shtohej.

Pesëmbëdhjetë minuta pa përfunduar ndeshja, edhe City mbeti me një futbollist më pak, pasi Vincent Kompany u përjashtua me karton të kuq pas ndërhyrjes në Jack Wilshere.

Megjithatë, baraspesha numerike në fushë, nuk u hyri në punë vendasve për të ndryshuar rezultat.

Manchester City mban pozitën e dytë në tabelë, me shtatë pikë më pak se Manchester Unitedi, ndërkohë që Arsenali mbetet në pozitën e gjashtë.