“Banda me kallashnikov”, dënim maksimal pesë shqiptarëve në Greqi

“Banda me kallashnikov”, dënim maksimal pesë shqiptarëve në Greqi

Vendime të rënda ka dhënë gjykata e Athinës për 5 shqiptarë të arrestuar në tetor të vitit 2011 në Greqi, me akuzën për krijimin e organizatës kriminale, përdhunimit, grabitjes, dhe armëmbajtjes pa leje.
Gjykata shqiptoi dënimin 25 vjet burg, për çdonjërin nga 5 nga të arrestuarit, i gjashti u shpall i pafajshëm dhe një tjetër është ende në kërkim.

Alexandër Pepa, Ermir Meta, Ervis Meta, Enea Pano e Sokrat Meniko që u arrestuan në tetor 2011 së bashku me një grek, njihen si “banda e grabitësve me kallashnikov” dhe ishin bërë tmerri i banorëve të zonës së Atikës, transmeton BW.

Policia dokumentoi 45 grabitje të armatosura që kishin kryer dhe numëron 14 automjete që ata i kanë vjedhur e përdorur për largimin e tyre. Gjatë kontrollit në banesat e të arrestuarve u gjetën 3 armë tip kallashnikov, karrikatorë me fishekë, plumba, predha, një pistoletë, 3 nga makinat e vjedhura, çelësa makinash, sasi të vogla marihuane, shkopinj gome, thika, telefona celularë etj. Policia thotë se ekzistojnë raste, kur ata pasi kanë grabitur, kanë abuzuar seksualisht me femrat që gjendeshin në shtëpi.

Sipas një ndryshimi që pritet të bëhet në kodin penal në Greqi, grabitësit që përdorin armë zjarri do të dënohen me burgim të përjetshëm.