Policia sekuestron tetë vetura

Policia sekuestron tetë vetura

Gjatë një operacioni policor që është realizuar në disa auto sallonet që merren me shitjen e veturave të përdorura, janë sekuestruar tetë vetura, bëhet e ditur nga Policia e Kosovës, e cila sqaron se shtatë prej tyre dyshohet se kanë shmangur pagesën e doganës, ndërsa njëra është falsifikuar.
“Më datë 14 mars 2013, njësiti i Auto Krimeve i cili bashkëvepron në kuadër të Drejtorisë për Hetimin e Krimit të Organizuar, në bashkëpunim me Auto Krimet rajonale dhe Doganën e Kosovës, ka ndërmarr një operacion për kontrollimin e auto salloneve.

Prej tyre shtatë nga veturat e sekuestruara dyshohet për ikje nga pagesa doganore dhe njëra prej tyre dyshohet si e falsifikuar, për të cilën është hapur rasti policor për hetime të mëtutjeshme”, thuhet në komunikatë të policisë.

Gjatë këtij operacioni policor janë kontrolluar rreth 300 vetura të llojeve të ndryshme për të cilat po vazhdon procedura e verifikimit. Deri me tani nuk raportohet për persona të arrestuar.

Në këtë operacion policor kanë asistuar edhe njësite tjera patrulluese policore dhe njësitet speciale.