Greqi, luftë me policinë, vriten 2 shqiptarë të arratisur nga burgu i Trikalas

2 prej shqiptarëve të arratisur nga burgu i Trikalas në Greqi, kanë mbetur të vrarë sot rreth orës 21:00, gjatë një përleshjeje me forcat policore greke EKAM, në zonën Koniska të Etoloakarnanias. 

Sipas medias greke, dy shqiptarët e vrarë janë Admir Murataj 41 vjec dhe Edison Lika, 25 vjec. 

Operacioni për kapjen e shqiptarëve të arratisur filloi në mëngjes dhe sipas disa informacioneve, 4 prej tyre ishin identifikuar nga kamerat termike të policisë. 

Pas identifikimit, vazhdoi një ndjekje intensive me helikopterë dhe qen policie. Gjatë mbrëmjes policia ndeshi me personat e armatosur, të cilët nuk u dorëzuan por hapën zjarr mbi policinë. Gjatë shkëmbimit të zjarrit mbetën të vrarë 2 prej tyre. 

Operacioni vazhdoi edhe pas kësaj ngjarjeje dhe në kërkim janë edhe 3 persona të tjerë, mes të cilëve edhe i shumëkërkuari Marian Kola. 

Kujtojmë se më 22 mars nga burgu i Trikalas u arratisën 11 shqiptarë, 3 prej të cilëve iu kapën menjëherë. 

8 të tjerë që nga ajo ditë janë endur nëpër zona të ndryshme të Greqisë dhe herë pas herë janë përleshur me armë me policinë. Gjatë një përleshjeje të tillë më 30 mars u vra 25 vjecarja Katerina Zogali, e cila kalonte rastësisht pranë vendit të ngjarjes, ndërsa më 17 qershor, të arratisurit vranë një polic 37 vjecar dhe carmatosën patrullën e tij të policisë.