Thaçi i gatshëm për koalicion mbarëshqiptar në Maqedoni

Lideri i PDSH-së, Menduh Thaçi deklaroi se asnjëherë nuk do të çojë PDSH-në në aleancë me Gruevskin dhe se është i gatshëm për një koalicion mbarëshqiptar nëse shqiptarët largohen prej politikës së kryeministrit maqedonas.
“Nacionalizmi i theksuar maqedonas kohët e fundit i ka rrënjët në përplasjet me Greqinë por pasojat e tij bien mbi shqiptarët. Diskriminimi që u bëhet shqiptarëve është i programuar dhe ndalet vetëm me një program që mund t’i bëjë ballë”, theksoi Thaçi për Top Channel.
Më tej Thaçi ka folur edhe për situatën ekonomike duke theksuar se maqedonasit kanë një program të shkatërrimit ekonomik për shqiptarët pasi nga i gjithë buxheti i shtetit shqiptarët përfitojnë vetëm 1 për qind prej tij.