Berisha: Ngrejmë komision hetimor që të enjten

Kryeministri Sali Berisha ka shprehur edhe një herë vullnetin për të diskutuar me opozitën, por ka këmbëngulur se kërkesa për hapjen e kutive është e pa realizueshme. Gjatë mbledhjes së grupit parlamentar të PD-së, Berisha ka kërkuar nga PS-ja që të listojë të gjitha problemet dhe ato do të shqyrtohen.
Sipas kryeministrit, gjykatat janë të pavarura dhe problemet e PS-së, me gjyqësorin nuk mund të shndërrohen në probleme midis saj dhe qeverisë. “Ajo që kam deklaruar i kam kërkuar dhe i kërkoj zoti Rama që të listojë të gjitha problemet dhe t’i trajtojmë me seriozitet më të madh. Ne jemi gati që të enjten që vjen të ngrejmë komisionin parlamentar dhe opozita të ketë shumicën. Gjykatat kanë vendosur, vendosin dhe do të vendosin sa herë që palët do t’i drejtohet gjykatës, por vendimi i tyre nuk është më problem palësh, por vetëm problem gjykatash. Unë nuk kam kërkuar të trajtoj problemet penale të gjykatave”, theksoi Berisha.
Kreu i qeverisë kujtoi rastet kur Gjykata Kushtetuese ka hedhur poshtë vendimet ose ligjet e miratuara nga qeveria, duke nënvizuar se në të gjitha këto raste, “ne nuk i kemi kërkuar opozitës të bëjmë diçka kundër vendimeve të gjykatave, pasi kanë rrëzuar ligjet dhe vendimet e qeverisë”.