Serbia të sigurojë stabilitet për Kosovën

Ndihmëssekretari amerikan i Shtetit, Philip Gordon ka thënë se historia “problematike” e Ballkanit, si në në fillim, ashtu edhe në fund të shekullit njëzet, ka qenë rezultat i “kufijve të paharmonizuar gjeopolitikë dhe etnikë” dhe i mosekzistimit të mekanizmave adekuatë politikë që kjo të kapërcehet.
Gjatë një ligjërate të zhvilluar javën e kaluar në Harvard, ky zyrtar i lartë të Departamentit të Shtetit ka vlerësuar se ndarja paqësore e Malit të Zi nga Serbia në vitin 2006 dhe Deklarata e pavarësisë së Kosovës më 2008, "përmbyllën kaptinën përfundimtare të shpërbërjes së ish-Jugosllavisë".
Duke folur për Kosovën Gordon mes tjerash ka thënë se ndonëse Gjykata Ndërkombëtare e Drejtësisë duhet të formojë mendimin e vet këshilldhënës, "SHBA-të do të mbesin të përkushtuara ndaj sovranitetit dhe integritetit territorial të Kosovës" dhe se "pavarësia e Kosovës është e pakthyeshme".
Gordon ka porositur "Serbinë që si aspirant i përgjegjshëm për BE të sigurojë stabilitet për Kosovën", dhe shpreson që "marrëdhëniet amerikano-serbe deri në fund të mandatit të kësaj administrate mund të bëhen model i parneritetit produktiv".