Ka ndërruar jetë gazetari Nehar Bojaxhiu

nga Li12i-GG ARMY Thu 25 Feb 2010 - 23:34

Prishtinë, 26 shkurt - Pas një sëmundjeje të rëndë, në moshën 77-vjeçare, të enjten mbrëma, ndërroi jetë Nehar Bojaxhiu, njëri nga doajenët e gazetarisë në Kosovë. Bojaxhiu u lind më 1933 në Prizren, ku kreu shkollën fillore dhe gjimnazin. Studioi gjuhën frënge. Në gazetën ,,Rilindja,, punoi që nga viti 1958 deri me 1961 ku u mor me tema të kulturës dhe me përkthime. Pastaj kaloi në Radio-Prishtinë, ku punoi deri më 1989, kur regjimi i Milosheviqit i dëboi të gjithë gazetarët dhe të punësuarit e tjerë shqiptarë. Në Radio-Prishtinë punoi në Redaksinë e emisioneve kulturore-arsimore. Nga viti 1978 deri me 1982 ka qenë redaktor i emisioneve kulturore-arsimore. Është autor i shumë shkrimeve nga lëmi i kulturës dhe i gjuhësisë.
Nehar Bojazhiu ishte edhe njohës dhe reporter i shquar edhe i sportit, boksit në veçanti. Kolegët dhe dëgjuesit e kohës i mbajnë mend reportazhet e tij impresive me rastin e ndarjes në Osllo të çmimit “Nobel” Nënë Terezës, ku ajo rrëfen në gjuhen shqipe për përkatësinë e saj kombëtare shqiptare, dokument ky që ruhet edhe sot në arkivat e Radio- Kosovës. Varrimi i të ndjerit bëhet nesër në varrezat e Prizrenit, në orën 13:00.