Kuqi "refuzon" Finlandën shkaku i Swanseas

nga Li12i-GG ARMY Fri 26 Feb 2010 - 1:22

Swansea, 26 shkurt - Sulmuesi kosovar Shefki Kuqi ka kërkuar leje që të mos paraqitet me Përfaqësuesen e Finlandës në miqësoren e javës së ardhshme kundër Maltës, pasi dëshiron të jetë në dispozicion të klubit të tij Swansea, njofton faqja zyrtare e klubit uellsian të enjten.
Kuqi 33-vjeçar ishte ftuar nga trajneri i Finlandës, Stuart Baxter, mirëpo kosovari e kishte "lutur" trajnerin që ta linte anash kësaj radhe.
"Unë kam biseduar me trajnerin e Finlandës dhe ai e kuptoi situatën time. Me skuadrën time Swansea kemi shtatë ndeshje të rëndësishme në mars, kështu që duhet të jem prezent në të gjitha", ka thënë Kuqi.
Sulmuesi vushtrrias me Swansean është duke luftuar për inkuadrim në Premier Leaguen e Anglisë. Ai te skuadra uellsiane u transferua në janar nga Koblenzi gjerman. Për ekipin e ri ka shënuar dy gola.
"Do të ketë shumë udhëtime këtë muaj dhe ndeshja me Maltën ishte vetëm miqësore, kështu që kërkova të mos ftohem. Të jem korrekt edhe trajneri ishte i kënaqur me vendimin tim dhe për këtë i jam falënderues", ka shtuar Kuqi.
Trajneri i Swaneas, portugezi Paulo Sousa, ka falënderuar Kuqin dhe Baxterin për këtë "sakrificë".
"Unë jam shumë i lumtur që Shefkiu po qëndron me ne. Ne mund të përgatitemi tash sa më mirë për sfida të radhës. Ka qenë një vendim i rëndësishëm për ne, veçanërisht pasi në mars na presin shumë ndeshje. Po ashtu është mirë që Finlanda ka lëshuar pe në këtë rast. I jam shumë falënderues për këtë trajnerit të Finlandës", ka thënë Sousa.
Swansea pas 32 ndeshjeve mban pozitën e katërt në Kategorinë e Dytë të Anglisë me 53 pikë. Kjo pozitë e dërgon skuadrën në plejof për inkuadrim në Premier League. Swansea të shtunën do të ballafaqohet me Peterborough Unitedin.
Për Swansean luan edhe Besain Idrizaj, por roli i tij është shumë i vogël, krahasuar me atë të Kuqit.Faleminderit për rekomandimin