Chavez s’i duron kritikat për jodemokraci

nga Li12i-GG ARMY Fri 26 Feb 2010 - 4:02

Karakas, 26 shkurt – Presidenti i Venezuelës, Hugo Chavez u zotua të premten ta tërheqë vendin e tij nga anëtarësia në trupin më të madh botëror të të drejtave të njeriut, pasi grupi e akuzoi atë një natë më parë për rrezikim të demokracisë dhe frikësim të kundërshtarëve.
Në një konferencë shtypi të transmetuar në televizionin kombëtar, lideri socialist e quajti Komisionin Ndër-Amerikan të të Drejtave të Njeriut “mafi” dhe liderin e tij “jashtëqitje”.
“Do të largohemi nga trupi”, theksoi Chavez.
Komisioni, që është një degë e Organizatës së Shteteve Amerikane (OAS), publikoi një raport të enjten, i cili paraqiti një pasqyrë alarmuese të represionit dhe jotolerancës në Venezuelë.
Raporti 319-faqesh përdori një gjuhë jashtëzakonisht të ashpër për forumin e 34 shteteve.
“Komisioni zbulon se pushteti ndëshkues i shtetit po shfrytëzohet për frikësimin dhe dënimin e njerëzve vetëm për shkak të opinioneve të tyre politike”, thuhet në raport. “Venezuela nuk i ka kushtet e domosdoshme për të qenë një mbrojtëse e të drejtave njerëzore dhe të gazetarëve për të kryer detyrat e tyre lirshëm”. Raporti cek se është vërejtur një “trend i tmerrshëm” i abuzimeve, dhunës dhe veprimeve ligjore për të frenuar dhe kriminalizuar protestat.
Dhe të gjitha këtyre kritikave Chavez iu kundërpërgjigj me sulme të stilit të zakonshëm të tij, duke e cilësuar Komisionin si një agjenci të politizuar dhe kundërshtuese të revolucionit të tij socialist.
“Ne do të përgatisim procedurat për prishjen e marrëveshjes së anëtarësisë së Venezuelës në Komisionin e ligë Ndër-Amerikan të të drejtave të njeriut dhe kështu do të tërhiqemi nga ai. Për ç’arsye? Nuk ia vlen mund, aty është e instaluar mafia”.