Kili: së paku 47 të vrarë nga tërmeti

nga Li12i-GG ARMY Sat 27 Feb 2010 - 0:50

Santiago, 27 shkurt – Një tërmet masiv me fuqi 8.8 të shkallës Rihter ka goditur pjesën qendrore të Kilit, duke vrarë të paktën 47 persona, raportuan mediet lokale.
Tërmeti goditi qytetin verilindor Concepcion, që është 317 km në jugperëndim të kryeqytetit Santiago.
Presidentja e vendit, Michelle Bachelet tha se tërmeti ka prekur edhe një grup të ishujve jugor dhe i bëri thirrje popullit kilian të jetë i qetë dhe të kontaktojë autoritetet nëse kanë nevojë për ndihmë.
Bachelet i paralajmëroi njerëzit të mos udhëtojnë në vendet e prekura nga tërmeti, pasi atje është shkatërruar një numër i urave.
Zyrtarët kilianë thanë se qyteti më i prekur është Parral, që është afër epiqendrës së tërmetit.
Disa spitale janë detyruar të evakuohen në një numër zonash, duke përfshirë edhe atë në Santiago, pas dëmtimeve në strukturë.
Në shumë ueb sajte kiliane të lajmeve dhe radio stacione nuk ka qasje.
SHBA ka lëshuar fillimisht një paralajmërim për cunami në Kili, Peru dhe Ekuador.
Më vonë, ka përfshirë edhe Kolumbinë, Antarktikun, Panamanë dhe Amerikën qendrore.
Agjencia meteorologjike e Japonisë ka paralajmëruar për një cunami të mundshëm në gjithë zonën e madhe të Paqësorit.
Aeroporti i Santiagos është mbyllur dhe të gjitha fluturimet janë anuluar deri në një njoftim tjetër, njoftuan zyrtarët e aviacionit.