Tërhiqet uji në periferi, të izoluara Velipoja e Dajçi

nga Li12i-GG ARMY Sat 27 Feb 2010 - 1:34

Shkodër, 27 shkurt - Zona e Nënshkodrës vazhdon të mbetet nën ujë, ndërsa është vënë re një përmirësim i situatës në lagjet periferike të qytetit verior. Shtabi i Emergjencave në Shkodër informon se edhe prurjet dhe shkarkimet nga hidrocentralet e Fierzës, Komanit dhe Vau i Dejës gjatë ditës së sotme janë pakësuar. Situatës i shkon për shtati edhe moti i thate dhe me diell që ka përfshirë gjithë zonën e Shkodrës ditën e sotme, raporton News24.

Forcat e Ushtrisë janë përqendruar në komunat e zonës së Nënshkodrës për ti ardhur në ndihmë banorëve me evakuimin e tyre, nëse pranojnë, apo me shpërndarjen e ndihmave ushqimore. Ka nisur furnizimi me ushqime dhe ujë të pijshëm për banorët e fshatit Obot të komunës Ana e Malit, disa fshatrave të komunës Dajç, në Malin e Jushit, në Bushat dhe një pjese të komunës Velipojë.

Problematike mbeten rrugët e fshatrave Obot dhe Goricë në komunën Ana e Malit, hyrja e rrugës kryesore të komunës Dajç dhe pjesa e aksit rrugor drejt Velipojës, pas Urës së Ded Gjo Lulit, të cilat janë të kalueshme vetëm nga mjetet e larta.