BE-ja bën gati një paketë shpëtimi për Greqinë

Protesta në Greqi kundër masave të ashpra ekonomike

Komisioni Evropian pritet të miratojë një paketë miliarda dollarëshe për t'i ardhur në ndihmë Greqisë për ta nxjerrë nga kriza financiare.


Kjo paketë do të jetë gati në rast se Greqia do të kërkojë ndihmë për të dalë nga kriza ekonomike. Deri tani Greqia nuk ka kërkuar ndihmë.

Zyrtarë në Bruksel thonë se paketa do të miratohet se shpejti, mendohet të finalizohet që të hënën që vjen.

Greqia ka një deficit prej 12.7%, katër herë më të lartë se ç'lejohet në eurozonë.

Qeveria ka vendosur ta ulë këtë deficit në 8.7 % këtë vit dhe të zvogëlojë borxhin kombëtar duke shkurtuar rrogat e punonjësve të shërbimeve publike, duke ngritur moshën e pensionit dhe duke rritur TVSH-në.

Këto masa të ashpra kanë shkaktuar një zemëratë të thellë në publik dhe gjithashtu kanë sjellë shvleftësimin e euros.

Korrespondenti i BBC-së në Bruksel Gavin Hewitt thotë se shpresohet që kjo paketë shpëtimi të jetë aty vetëm në rast urgjence dhe jo një domosdoshmëri.

Gjermania dhe Franca mednohet se janë kontribuesit më të mëdhenj deri tani, nga britania nuk ka patur ndonjë ofertë - thotë korrespondenti ynë.