Dy aksidente në Tiranë, një vdes, tre plagosen, pranga shoferëve

TIRANE – Policia e kryeqytetit tha se ka arrestuar autorët e dy aksidenteve të ndodhura gjatë 24 orëve të fundit në Tiranë me pasojë plagosjen e tre personave dhe vdekjen e një tjetri.
“Specialialistët e Seksionit të Hetimit të Aksidenteve realizuan arrestimin në flagrancë të shtetasit Avni Rrustem Gaxha, 43 vjec, banues në Tiranë.
Ky shtetas dje duke drejtuar automjetin tip “Benz mikrobuz”, me targë TR 6278 F, në autostradë në drejtim lëvizje Vorë - Tiranë, në afërsi të mbikalimit Kashar, ka goditur nga pas automjetin tip “Astra” Betoniere, me targë TR 4237 J, që drejtohej nga shtetasi Gëzim Doda”, thuhet në një deklaratë të policisë.
Sipas saj, për shkak të aksidentit, është dëmtuar vetë drejtuesi i mjetit, shtetasi Avni Gaxha si dhe dy pasagjer që ndodheshin në këtë mjet, të cilët ndodhen jashtë rrezikut për jetën ndërsa pasagjeri, shtetasi Shkëlqim Selim Hoxha, 30 vjec, ndodhet në gjëndje të rënduar shëndetësore.
Policia tha gjithashtu se nga Specialialistët e Seksionit të Hetimit të Aksidenteve është realizuar arrestimi në flagrancë i shtetasit Florent Fejzi Elezi, 23 vjec, banues në Tiranë.
“Ky shtetas dje duke drejtuar automjetin tip “Audi A4” me targë TR 3627 M, në rrugën me drejtim lëvizje nga Kombinati për në qender Tiranë, ka aksidentuar këmbësoren 68 vjeçare Metie Shahin Sefa.
Drejtuesi i mjetit pas aksidentit është larguar nga vendngjarja, ndërsa e dëmtuara me një mjet të rastit është dërguar në Spitalin Ushtarak Tiranë dhe rreth orës 19.30, ka gjetur vdekjen”, sqaroi policia.
Sipas saj, në të dy rastet, ndaj autorëve të aksidentet u referua dosje penale në prokurori me akuzën e shkeljes së rregullave të qarkullimit rrugor me pasoja të rënda.