Rama: Rritja ekonomike, 0 përqind

Duke e vënë theksin tek kriza ekonomike, e cila sipas tij ka hedhur rrënjët në cdo cep të vendit, kreu i Partisë Socialiste Edi Rama akuzoi qeverinë se jo vetem nuk po reflekton në këtë situatë por përkundrazi sipas tij ajo po vijon të drejtojë me politikën e saj ekonominë shkatërruese. (UPDATE)


Kryesocialisti iu referua shifrave të dhëna nga ekspertët dhe raportet e ndërkombëtarëve për të theksuar se pavarësisht manipulimit të shifrave që kërkon të bëjë qeveria, rritja ekonomike për vitit 2009 nuk shkon më shumë se 0 përqind me një tendencë sipas tij në rënie. Sipas kreut të Partisë Socialiste kjo situatë eshte e lidhur pashmangshmërisht me transparencën e zgjedhjeve .

“Ne sot jemi më të vendosur se kurrë që të kërkojmë transparencën e zgjedhjeve të shkuara, për të garantuar zgjedhjet e ardhshme dhe të protestojmë për të ndalur rrënimin ekonomik”, u shpreh Rama.

Sipas zotit Rama marrëdhënia e kushtëzuar e socialistëve me kuvendin e Shqipërise do të vazhdojë deri ne momentin kur të bëhet transparenca e zgjedhjeve si një moment kyc për kreun e opozitës për të rikthyer demokracinë në vend.

“Kemi shkruar një ligj për zgjedhjet dhe sot kemi një parlament të dalë nga shkelja e këtij ligji. Kemi patur një ligj për zgjedhjet dhe sot kemi dy palë në konflikt se nuk është zbatuar ligji. Në rast se moszbatimi i ligjit kthehet në normë, atëherë ne jemi në kushtet kur populli duhet të marrë fatet e veta në dorë. Protesta është e vetmja rrugë deri në mosbindjen civile”, u shpreh Rama.

Kreu i opozites ka ftuar kryeministrin te refletoje dhe te mos vazhdoje sipas tij te drejtoje vendin drejt nje rruge pa krye duke rrenuar cdo dite e me shume shqiptaret.