Lauka: Nuk ka komb kosovar

Islam Lauka, ambasador i Shqipërisë në
Kosovë, të premten, në Kaçanik ka deklaruar se nuk ka komb kosovar.
"Unë e di dhe jam i sigurt se kombet nuk krijohen me pult komandimi, nuk
krijohen me porosi, nuk krijohen siç rriten domatet në sera, me urdhër
të këtij apo atij", ka deklaruar ai.

Këto komente ambasadori Lauka i ka bërë
në simpoziumin shkencor me temë: "Kryengritja e vitit 1910 në Kosovë", i
organizuar në shënim të 100-vjetorit të betejës së shqiptarëve me
forcat osmane në Grykë të Kaçanikut. Sipas tij, kombet janë diçka shumë
serioze dhe duhet një kohë relativisht e gjatë për t'u krijuar, ashtu
siç iu desh kombit shqiptar për t'u krijuar në beteja, shpesh në zjarr e
hekur; ashtu siç ishte Beteja e Kaçanikut, ashtu siç ishte Beteja e
Carralevës, ashtu siç ishin krejt betejat e lavdishme të fillimit të
shekullit XX, në mënyrë të veçantë ato të viteve 1910-1912.
"Mendoj
se në rast se nuk do të ishte Kaçaniku (30 prilli 1910), nuk do të ishte
Vlora (28 nëntori 1912)..., po të mos ishte Vlora vështirë se do të
vinim te 17 shkurti i 2008-s", është shprehur ai. Duke polemizuar në
distancë me preferuesit e paktë të kombit kosovar, Lauka i ka përsëritur
pohimet se kombi është një referendum i përditshëm. "Dhe është kështu,
ndërsa kombi shqiptar e ka dëshmuar më 1999", ka nënvizuar ai. Sipas
tij, 1999-ta ishte një referendum, një provë e vështirë, të cilën
shqiptarët e përballuan me shumë sukses, me shumë dinjitet.