Nesër balotazhi në Partesh

Komuna më e re e Kosovës, Parteshi, është bërë gati për zgjedhjet e së dielës, për të dytën herë brenda dy muajve të fundit. Komisioni Qendror Zgjedhor ka konfirmuar se janë bërë të gjitha përgatitjet për këtë raund të dytë zgjedhjesh, meqë në qershor asnjëri nga kandidatët për kryetar nuk fitoi numrin e nevojshëm të votave për t’u ngjitur në postin e kryetarit të komunës. Nesër, në balotazh do të garojnë kandidatët Nenad Cvetkoviq dhe Todor Mirkoviq. Cvetkoviq, nga iniciativa qytetare “Zaviçaj”, në zgjedhjet e qershorit fitoi 47, 68 për qind të votave, kurse kandidati tjetër Mirkoviq, i Inciativës së Listës së Bashkuar Serbe (JSL) – 25, 46 për qind të votave, që nuk ishin të mjaftueshme për asnjërin që të shpallej kryetar i Parteshit.
Në territorin e komunës së Parteshit nesër nga ora shtatë e mëngjesit do të hapen të gjitha vendvotimet - 5 vendvotime dhe tri qendra numërimi. Të drejtë votimi kanë 3 mijë e 508 votues. Në raundin e parë përqindja e pjesëmarrësve në votim ishte shumë e mahde – mbi 65 për qind.
Për të monitoruar këto zgjedhje janë akredituar shumë vëzhgues vendorë e ndërkombëtar si dhe përfaqësues vendesh që kanë përfaqësitë e tyre diplomatike në Kosovë.