Thaçi udhëton nesër për në SHBA

Një delegacion nga Republika e Kosovës, i kryesuar nga kryeministri Hashim Thaçi, të dielën do të udhëtojnë për një vizitë zyrtare në Shtetet e Bashkuara të Amerikës dhe, siç është paralajmëruar, gjatë kësaj vizite kryeministri Thaçi, në Shtëpinë e Bardhë, do të zhvillojë një takim me zëvendëspresidentin e Shteteve të Bashkuara të Amerikës, Joseph Biden.

Zyra e kryeministrit ka bërë të ditur se në kuadër të vizitës zyrtare në SHBA, kryeministri Thaçi do të ketë takime në Departamentin e Shtetit dhe në Kongresin e SHBA-ve, ndërsa do të pritet në takime të nivelit të lartë edhe nga udhëheqësit e Bankës Botërore dhe Fondit Monetar Ndërkombëtar.

Po ashtu, kryeministri Thaçi në Institutin e Paqes të Shteteve të Bashkuara të Amerikës, do të mbajë ligjëratë me temën "Ndërtimi i të ardhmes euro-atlantike të Kosovës: Sfidat dhe mundësitë para nesh".

Në përbërje të delegacionit kosovar është bërë e ditur se do të jetë edhe ministri i Ekonomisë dhe Financave, Ahmet Shala, i cili do të merr pjesë në mbledhjen e Bordit të Fondit Monetar Ndërkombëtar, që do të mbahet në Uashington, prej 18 deri më 24 korrik 2010.

Në kuadër të kësaj vizite zyrtare në SHBA, ministri Shala do të jetë pjesë e takimeve të delegacionit kosovar në Departamentin e Shtetit dhe në Kongresin e SHBA-ve, ndërsa do të pritet në takime të nivelit të lartë edhe nga udhëheqësit e Bankës Botërore dhe Fondit Monetar Ndërkombëtar.

Nuk është thënë se a do t’i bashkëngjitet këtij delegacioni edhe ministrja e Administratës Publike, Edita Tahiri, e cila gjatë kësaj jave qëndroi në Uashington dhe Boston të Shteteve të Bashkuara të Amerikës.