Thaçi: Gjykatat do të jenë më efikase

Qeveria e Kosovës, në mbledhjen e mbajtur të hënën, ka aprovuar projektligjin për gjykata në Kosovë dhe projektligjin për ndryshimin dhe plotësimin e Ligjit për ujitjen e tokave bujqësore.
Duke riafirmuar angazhimin e Qeverisë së Republikës së Kosovës për reformimin e sistemit të drejtësisë në Kosovë, kryeministri Hashim Thaçi ka thënë se gjykatat në Kosovë, me aprovimin e Ligjit për Gjykatat, do të jenë më efikase dhe do të përmbushin misionin e tyre për zbatimin dhe mbrojtjen e ligjit, duke funksionuar shpejtë dhe drejtë në zgjidhjen e lëndëve gjyqësore.
Ligji i ri për gjykatat përcakton formën organizative të gjykatave në Kosovë dhe shtrirjen e tyre në të gjitha qendrat e Kosovës, me shtatë gjykata themelore dhe degët e tyre nëpër komunat e Kosovës.
Me propozimin e Ministrisë së Kulturës, Rinisë dhe Sportit, Qeveria ka aprovuar vendimin për ndarjen e mjeteve për shënimin e 100 vjetorit të lindjes së Nënës Terezë.
Ministria e Kulturës..., me Këshillin Organizativ për shënimin e këtij jubileu dhe vitin 2010 do ta shpallë “Vit të Nënë Terezës”. Gjatë tërë vitit 2010 do të organizohen manifestime të ndryshme kulturore dhe shkencore në përkujtim të humanistes së madhe Nëna Terezë. /