Berisha: GJND mbyll pazaret për territore

Ai ka thënë se e drejta e Kosovës është përsëritur në çdo
fjalë që është thënë në GJND. “Ju e patë se çfarë analize të kristaltë
ku në çdo germë në çdo fjalë, në çdo fjali sanksionohej e drejta e
pavarësisë së Kosovës. Ishte sepse dua të them se ky vendim pritej, të
jemi të hapur. Pritej nga shumë e shumë vende të botës të cilat kishin
respektin më të madh për sakrificën më të madhe për qytetarët e
Kosovës”, ka thënë Berisha.

I pyetur nëse Shqipëria e ka
plotësuar misionin e saj për lobimin për pavarësinë e Kosovës, Berisha
ka thënë se Shqipëria ka bërë çdo përpjekje të mundshme për të ndikuar
në njohjen e pavarësisë së Kosovës.

“Në të gjitha takimet
ndërkombëtare të kryeministrit, presidentit, kryetares së parlamentit,
çështja e parë në agjendë e këtye takimeve pa diskutim ka qenë njohja e
pavarësisë së Kosovës. Kjo është një betejë që vazhdon, por duhet të
themi të vërtetën që vendimi i Gjykatës së Hagës i ka dhënë mbështetje
më të fuqishme pas njohjes nga 69 vende këtij procesi. Ne përveç kësaj
kemi pasur në mënyrë të vazhdueshme emisarë të posaçëm. Kemi trokitur
në kancelaritë e të gjitha kontinenteve dhe në bashkërendim me Qeverinë
e Kosovës do të vazhdojmë përpjekjen tonë pa ndërprerë”, ka thënë
kryeministri i Shqipërisë.

Sa i përket tendencave për
shkëmbimin e territoreve, Berisha është rikthyer tek vendimi i GJND-së,
në të cilin thuhet se pavarësia e Kosovës nuk ka shkelë asnjë fjalë
asnjë dokument ndërkombëtar, ndërkaq ka shprehur çdo përpjekje për të
bërë pazare me territore.

“Qëndrimi është i njohur. Jemi
kategorikisht kundër çdo përpjekje, për pazare territoriale. Kjo
Gjykatë i dha fund, mbylli në mënyrë përfundimtare kapitullin e
pazareve territoriale për shqiptarët. Është e vërtetë se shqiptarët
janë të vendosur në katër shtete, por është e vërtetë se ideali i tyre
është integrimi evropian”, ka thënë Berisha.