Pas GJND-së, normalizim i marrëdhënieve Serbi-Kosovë

Ambasadori francez në Beograd, Jean Francois Terral ka deklaruar për mediat serbe, se Franca nuk planifikon të ndryshojë qëndrimin e saj ndaj pavarësisë së Kosovës, pa marrë parasysh se çfarë mund të jetë mendimi këshillëdhënës i Gjykatës Ndërkombëtare të Drejtësisë.
Madje, Terral ka thënë se pas vendimit të GJND-së, duhet të arrihet normalizimi i marrëdhënieve në mes të Kosovës dhe Serbisë.
“Kur Gjykata Ndërkombëtare e Drejtësisë të nxjerrë mendimin – pa marrë parasysh se çfarë do të jetë kuptimi i tij – do të jetë e nevojshme të punohet në qetësimin dhe normalizimin e marrëdhënieve në mes të Serbisë dhe Kosovës, me qëllimin përfundimtar që të gjitha vendet e rajonit të hyjnë në BE dhe të zhvillohen marrëdhëniet harmonike në mes të gjithë këtyre shteteve”, ka thënë Terral.
Terral po ashtu ka shtuar se, çështjet e hapura duhet t’i zgjidhin Beogradi dhe Prishtina.