Qeveria premton mbrojtje institucionale për Haradinajn

Qeveria e Kosovës thotë se do t’i kryejë të gjitha obligimet që i
kërkohen për mbrojtjen në Hagë të liderit të AAK-së, Ramush Haradinaj.

Përfaqësues të institucioneve dhe të partive politike kanë shprehur
besimin në drejtësinë ndërkombëtare, sikurse dhe në pastërtinë e luftës
së Ushtrisë Çlirimtare të Kosovës, andaj besojnë se Ramush Haradinaj, i
cili u ndalua dje nga dhoma e apelit në Hagë, do të shpallet i
pafajshëm në rigjykim.

“Qeveria e Kosovës do t’i kryej të
gjitha obligimet e saj që kërkohen edhe në kuadër të kornizave ligjore,
por edhe në kuadër të ekipit mbrojtës. Një veprim të tillë e kemi bërë
edhe herën e parë dhe nëse kërkohet do ta bëjmë prapë”, ka thënë
zëvendëskryeministri Hajredin Kuçi.

Edhe ministri i Punëve të
Brendshme ka shprehur besimin e plotë në pafajësinë e kreut të AAK-së,
duke thënë se Haradinaj do ta dëshmojë këtë. “Ne kemi besim edhe në
Gjykatën e Hagës, kemi besim edhe në pafajësinë e Ramushit dhe
sigurisht edhe ai do ta dëshmojë në këtë rigjykim”, ka thënë Rexhepi,
transmeton KosovaPress.

Vendimi i djeshëm i Tribunalit të
Hagës ishte befasues për nënkryetarin e LDK-së, Eqrem Kryeziu, i cili
megjithatë konsideron se një vendim i tillë nuk do të ketë ndikime
anësore, sikur që mund të konsiderohet se mund të ketë ndikim në
vendimin e GJND-së.

“Ky është një vendim befasues, por nga ana
tjetër institucionet e tilla serioze nuk e lidhin fatin e individit me
fatin e një vendi, kështu që nuk besoj se do të ketë ndonjë ndikim”,
ka thënë Kryeziu.

Kurse, nënkryetari i LDD-së, Naser Rugova,
konsideron se shteti duhet të përkujdeset për të ndihmuar Haradinajn të
përballet sërish me Gjykatën e Hagës.

“Konform pozicioneve
që ka pasur Haradinaj, si lider i AAK-së, por edhe si një lider i
fuqishëm opozitar, vërtetë, shteti i Kosovës duhet të përkujdeset për
të ardhmen e tij dhe për ndihmat e gjithanshme që ka nevojë Haradinaj
dhe për procedurat që ka Tribunali i Hagës”, ka thënë Rugova.

Kurse nënkryetari i AAK-së, Ardian Gjini ka përcjell porosinë e Haradinajt dhënë nga Haga.

“Deklarata e parë e kryetarit Haradinaj dje ka qenë, saktësisht në këtë
drejtim, deklarata e tij e parë ka qenë se sot do të jetë një ditë e
rëndësishme për Kosovën, keni kujdes që çkado që bëni këtë ditë të jetë
në interes të vendit, në interes të popullit. Kjo ka qenë deklarata e
tij e parë. Sot kemi një ditë të rëndësishme, duhet të shohim t’i
ndihmojmë Kosovës, do të merremi me të gjitha çështjet në të ardhmen.
Çështja e ndaljes së zotit Haradinaj nuk ka qenë gjë e mirë, por edhe
njëherë po them se ka qenë porosi e tij e qartë se sot e kemi një ditë
të rëndësishme për Kosovën”, ka thënë Gjini.

Kreu i Aleancës
për Ardhmërinë e Kosovës, Ramush Haradinaj dje është ndalur në
paraburgim nga dhoma e apelit e Tribunalit të Hagës, e cila ka
shfuqizuar pjesërisht vendimin e trupit gjykues për rastin e Ramush
Haradinajt, Idriz Balajt dhe Lahi Brahimajt, duke rikthyer në rigjykim 6
nga 32 akuzat fillestare për tre ish luftëtarët e Ushtrisë Çlirimtare
të Kosovës.