“Shaqiri” shkëlqimi i vetëm i Zvicrës

nga **Binni** Fri 10 Sep 2010 - 10:20

Mesfushori kosovar Xherdan Shaqiri ishte shkëlqimi i vetëm i Zvicrës në disfatën që pësuan “helvetikët” të martën mbrëma në ndeshjen eliminatore për Evropianin 2012 nga Anglia me rezultatin 3:1.

Shaqiri, 18-vjeçar, u fut në lojë në fillim të pjesës së dytë dhe shënoi golin më të bukur të ndeshjes, duke e mposhtur portierin e Manchester Cityt, Joe Hart, me një goditje të fuqishme nga 25 metra. Ky gol i Shaqirit mund t’ia ketë hapur dyert drejt një transferimi disamilionësh në Premier Leaguen e Anglisë. Për Shaqirin ky ishte goli i parë në fanellën e Zvicrës.

“Për Shaqirin goli me Anglinë mund të sjellë një situatë tejet të lakmueshme. Ata që e njohin politikën e transferimeve të skuadrave anglezeve, janë edhe në dijeni se një gol i tillë në shumicën e rasteve është fillimi i një transferimi disa milionësh. Ndoshta goditja e Shaqirit ka qenë një goditje milionëshe”, shkruan gazeta zvicerane “Aargauer Zeitung”.

Shaqiri ishte shqiptari i vetëm në radhët e Zvicrës për ndeshjen kundër Anglisë. Njëherësh ishte edhe lojtari më i mirë te “helvetikët”.

“Në humbjen 1:3 kundër Anglisë vetëm Shaqiri tregoi zemër”, shkruan gazeta zvicerane “Blick”.
Shaqiri vetë ndonëse ishte shumë i lumtur për golin e shënuar, prapë nuk mundi t’i gëzohej shumë, pasi që përfaqësuesja e tij pësoi.

“Edhe pse goli ishte mjaft i bukur, atij nuk mund t’i gëzohem. Kemi mundur të nxjerrim më shumë. Por, me përformancën e pjesës së dytë mund të jemi të lumtur. Pas përfundimit të ndeshjes portieri anglez Joe Hart më përgëzoi për golin që shënova”, ka thënë Shaqiri.

Trajneri i Zvicrës, Ottmar Hitzfeld, po ashtu ka përgëzuar Shaqirin për performancën e treguar, njëherësh edhe ka arsyetuar vendimin e tij për të mos aktivizuar kosovarin që nga fillimi.
“Unë e kam parashikuar që ta aktivizoj Shaqirin në pjesën e dytë, që të mund të bëj ndryshimin. Po ta aktivizoja nga fillimi, atëherë nuk do të luante kështu si luajti. Por, Xherdani për moshën e tij është mjaft para. Këtë e ka treguar edhe kundër Anglisë”, ka thënë Hitzfeld.
Shaqiri me Përfaqësuesen “A” të Zvicrës debutoi në mars të këtij viti. Ai ishte pjesë e “helvetikëve” në Botërorin 2010 të futbollit të mbajtur në Afrikë të Jugut, ku u aktivizua disa minuta në ndeshjen e fundit të fazës grupore kundër Hondurasit.

Shaqiri stinorin e kaluar me Baselin e fitoi titullin e kampionit të Zvicrës dhe Kupën e Zvicrës. Ai u shpall edhe lojtari më i mirë i ri i vitit në Zvicër.
Me Baselin do të luajë në fazën grupore të Ligës së Kampionëve.