BERISHA\Mirpresim emigrantet qe do te riatdhesohen

Tiranë/ 15 Shtator - Kreu i qeverisë ka falenderuar Komisionin Europian për raportin e fundit për heqjen e vizave dhe tha se kjo është meritë e qeverisë që ka luftuar krimin e organizuar,korrupsionin dhe ka vënë në zbatim politikën për të mirëpritur emigrantët që do të riatdhesohen.
“Sot , kryefjala nuk mund të jetë tjetër veçse një falënderim dhe mirënjohje e thellë ndaj Komisionit Evropian, i cili ka dorëzuar raportin përfundimtar për heqjen e vizave dhe mbi bazën e të gjitha vlerësimeve e inspektimeve të shumta të realizuara gjatë shtatë muajve, për të gjithë problematikën e 120 kërkesave që ka udhërrëfyesi për heqjen e vizave, konkludon se Shqipëria duhet të vendoset në listën pozitive, pra duhet të konsiderohet për heqjen përfundimtare të vizave, heqje e cila është për një afat 90 ditor.

Kjo sigurisht përbën një lajm shumë pozitiv, dhe po me predispozitë të madhe pozitive këtë lajm e ka pritur dhe vlerësuar Komisioni i Parlamentit Evropian për drejtësi, siguri dhe emigracion. Për ne ka një rëndësi shumë të madhe që ky raport të përshtatet si një program konstant pune në mënyrë që arritjet reale të padiskutueshme të shënuara në përpjekjen tonë, për të merituar heqjen e vizave të konsolidohen dhe të avancohen sepse kjo përbën pa diskutim, një arritje historike për qytetarët shqiptarë.” ka deklaruar Berisha

“Kjo shënon arritjen më të madhe në drejtim të lirive, të lëvizjes në tërë historinë e tyre, por nga ana tjetër përbën dhe një konsolidim të përpjekjes sonë për ta bërë këtë vend më të sigurtë, për ta bërë këtë vend më të lirë, një konsolidim të përpjekjes sonë në luftën kundër krimit të organizuar, kundër korrupsionit, në zbatimin e politikave më modern për emigracionin, për të mirëpritur të kthyerit. Përbën një obligim më madhor, në mënyrë që në Shqipëri standardet evropiane të progresojnë, të zhvillohen dhe të konsolidohen.” ka thënë kryeministri.