Greqi, emigrantët në grevë

“Nuk shpenzojmë asnjë euro për 24 orë. Nuk blejmë asgjë në datën 1 mars”. Kjo është motoja e lëvizjes paqësore “24 orë pa ne” e cila u bën thirrje gjithë emigrantëve në Greqi të mos shpenzojnë asgjë ditën e sotme, në shenjë proteste dhe rezistence ndaj racizmit dhe ksenofobisë, si dhe ndaj izolimit të emigrantëve që jetojnë dhe punojnë në mënyrë paqësore në shtetin grek.
Krijuesit e lëvizjes, midis tyre edhe emigrantë shqiptarë kanë mbledhur brenda pak ditësh mbi 6000 anëtarë në një faqe të rrjeteve sociale.
"Është një lëvizje që ka filluar për herë të parë në Amerikë", deklaron një prej iniciatorëve, gazetari shqiptar Niko Ago, kur mijëra protestues dolën në rrugë, nxënësit munguan në shkolla, punëtorët nuk shkuan në fabrika. Amerika përjetoi një çast pa emigrantët e saj.
Përderisa në Greqi emigrantët nuk mund të mos shkojnë në pune, sepse ka rrezik ta humbin atë, atëherë lëvizja “24 orë pa ne” u bën thirrje që ata të mos shpenzojnë për një dite, asnjë euro.
"Duhet të kuptojnë grekët dhe gjithë evropianët - deklarojnë iniciatorët e lëvizjes - se çfarë do të thotë të jetojnë qoftë edhe një ditë pa emigrantët e tyre, se pa ta nuk do të ishte i mundur asnjë proces i ndërtimit të civilizimit, se shtypja e të drejtave të tyre dëmton dhe fyen shoqëritë perëndimore, në terësinë e tyre".