Besim te SHBA-të

Besim te SHBA-të

Përfaqësues shtetërorë të Kosovës, të partive opozitare dhe ata të shoqërisë civile, vlerësojnë se roli lehtësues i Shteteve të Bashkuara të Amerikës në bisedimet ndërmjet Prishtinës e Beogradit është i domosdoshëm për përfundimin e suksesshëm të këtij procesi. Qytetarët po ashtu kanë më shumë besim te Washingtoni se sa të Brukseli në “ndarjen e drejtësisë” ndërmjet Kosovës dhe Serbisë.
Zyrtarë të lartë amerikanë ritheksuan, ditë më parë, mbështetjen e Washingtonit për zhvillimin e bisedimeve ndërmjet Kosovës dhe Serbisë, mirëpo për Prishtinën, shndërrimi i kësaj mbështetjeje në një rol lehtësues të bisedimeve karshi atij të Bashkimit Evropian, është i domosdoshëm.

“Konsiderojmë se për të qenë më të lehta dhe më të besueshme, e më të suksesshme këto bisedime, si lehtësues do të ishin edhe përfaqësuesit e Bashkimit Evropian edhe ata të Shteteve të Bashkuara”, ka deklaruar ushtruesi i detyrës së presidentit të Kosovës, Jakup Krasniqi.

Drejtori ekzekutiv i Klubit për Politikë të Jashtme, Yll Hoxha, ka thënë se nuk ka pasur asnjë proces të suksesshëm negociator në Ballkan pa përfshirjen e Shteteve të Bashkuara. Andaj, sipas tij, do të jetë i padiskutueshëm roli i Washingtonit në bisedimet ndërmjet Prishtinës e Beogradit.

Ish-anëtari i ekipit kosovar në negociatat e Vjenës, njëherësh nënkryetar i Aleancës për Ardhmërinë e Kosovës, Ardian Gjini, ka thënë se roli i Shteteve të Bashkuara të Amerikës në dialogun Prishtinë-Beograd nuk do t'i dëmtojë interesat e Serbisë. Sipas Radios Evropa e Lirë, Gjini ka thënë se kërkesat e zyrtarëve serbë që flasin për futjen të faktorëve të tjerë, si Kombet e Bashkuara apo Rusia, në bisedimet ndërmjet palëve, vetëm se do t’i komplikonin punët.

Agjenda, formati dhe koha e bisedimeve për, siç thuhet, çështje teknike ndërmjet palës serbe dhe asaj kosovare, megjithatë nuk dihen. Në Beograd thonë se nisja e bisedimeve me Kosovën po zvarritet për shkak të zgjedhjeve të jashtëzakonshme parlamentare në Kosovë. Por ushtruesi i detyrës së presidentit të Kosovës, Jakup Krasniqi, ka thënë se pengesë në kontaktet dhe bashkëpunimin ndërmjet Kosovës dhe Serbisë historikisht ka qenë pala serbe, e jo ajo kosovare.

Qytetarët e Kosovës i shohin siç, siç u shprehën ata, ndarës të drejtësisë Shtetet e Bashkuara të Amerikës në raportet ndërmjet Kosovës e shtetit serb. Bedri Mehmeti shpjegon pikëpamjen e tij: “Kosova ka pasur nevojë për drejtësi qysh prej shekujsh dhe besojmë se këtë radhë amerikanët po e ndajnë drejtësinë për Kosovën”. Mendim të ngjashëm shpreh edhe Nazmi Përvetica: “Sipas mendimit tim, janë ato (SHBA-të) që na përkrahin më shumë lidhur me drejtësinë në Kosovë, sesa Evropa”.