Kosovë, ekspertët: Ligj i ri elektoral

nga Vizitor Mon 27 Dec 2010 - 22:56

Polemikat që shoqëruan procesin zgjedhor në Kosovë, me rinumërimin dhe me përsëritjen e zgjedhjeve në tre komuna, kanë risjellë në vëmendje nevojën e ndryshimit sërish të ligjit elektoral.Të këtij mendimi janë ekspertë dhe ish-drejtues të komisionit zgjedhor të Kosovës. “Duhet një kod i ri zgjedhor në të cilin duhet të përfshihen materiet ligjore dhe nënligjore, duke filluar nga 5 ligje të domosdoshme elektorale. Ligjin mbi zgjedhjet e përgjithshme, ligji për KQZ-në, ligji për zgjedhjet lokale, ligj mbi partitë dhe ligji për financimin e partive”, deklaron Mazllum Baraliu, ish-kryetar i sekretariatit të KQZ-së. Ndërsa Zait Xhemali, ish-kryetar i KQZ-së, sugjeron largimin e militantëve partiakë nga procesi i përgatitjes së infrastrukturës zgjedhore. “Kemi pasur votime me kosh, që sipas mendimit tim janë pengesa që duhen hequr. Qytetari shkon e voton në disa qendra dhe më pas dalin problemet. Komisionerët nuk duhet të jenë partiakë. Partitë politike duhet t’i lënë njerëzit e tyre vetëm si vëzhgues”, shprehet Xhemali.