Studimi: Cunami kishte lartësinë prej 23 metrave

nga Prada Sat 19 Mar 2011 - 2:11

Vala e cunamit, i cili pas tërmetit shkatërroi verilindjen e Japonisë, ka qenë i lartë të paktën 23 metra, tregon studimi më i ri që sot e publikoi e përditshmja Jomiuri shimbun.
Instituti për hulumtimin e aeroporteve dhe porteve detare e ka regjistruar këtë të dhënë te vendi Ofunato, në prefekturën Ivata, ku vala me lartësi prej 23 metrash ka fshirë nga faqja e dheut qytete të tëra, shkruan gazeta japoneze.
Cunami më i lartë (38.2 metra) në histori ka goditur gjithashtu Japoninë, në vitin 1896, përkujton agjencia franceze AFP.
Sipas të dhëna më të reja të policisë nga cunami dhe tërmeti i të premtes së kaluar kanë vdekur 6 911 persona. Por, edhe mbi 10 mijë persona janë ende të pagjetur.
Pos pasojave shumë të rënda në njerëz dhe ato materiale, Japonia tashti po ballafaqohet me një rrezik edhe më të madh, me rrezatimin radioaktiv nga centralet bërthamore të dëmtuara rëndë nga tërmeti. Sipas shefit të Agjencisë ndërkombëtare për energji bërthamore (IAEA), Yuki Amano Japonia është duke zhvilluar betejën e madhe me kohën.
“Kjo është një fatkeqësi shumë e rëndë dhe serioze”, u shpreh ai, duke menduar në shpërthimet dhe zjarret që kanë përfshirë centralin bërthamor Fukushima 1. “Andaj është me rëndësi që bashkësia ndërkombëtare, përfshirë edhe IAEA, të bashkohet në zgjidhjen e kësaj situate. Veçmas është me rëndësi ftohja e reaktorëve dhe unë mendoj se kjo është një garë me kohën”.
Reja radioaktive nga centrali Fukushima momentalisht po lëvizë në drejtim të Pacifikut, por sipas parashikimeve të Entit për meteorologji dhe gjeodinamikë, në Vjenë, kjo re të dielën do të mund të përfshinte sërish pjesë të Japoninë. Sipas këtij enti, të dielën, shkaku i reshjeve atmosferike dhe erërave, gjendja do të mund të bëhet kritike edhe në kryeqytetin prej 30 milionë banorësh, Tokio.