Cunami arrin në Havai dhe Rusi

nga Li12i-GG ARMY Sat 27 Feb 2010 - 23:59

Havai, 28 shkurt - Valët e para të cunamit, të shkaktuara nga tërmeti i fuqishëm në Kili, arritën në brigjet e Havait në shtunën në mbrëmje, dikur pas orës 23.00. Ekspertët vlerësojnë se valët nuk do të arrijnë përmasa katastrofike, por paralajmërojnë se gjendja është shumë serioze. Më herët, valët e cunamit prekën brigjet e Polinezisë franceze.
Në gjithë Havain, të shtunën janë dëgjuar alarmet që paralajmëronin popullsinë të largohet nga bregdeti, pasi që shumë shpejt “valë të rrezikshme” do të godisnin, por nuk priten fatkeqësi në shkallë të gjerë.
Presidenti amerikan Barack Obama deklaroi se SHBA-ja është e gatshme për cunami, që mund të godet bregdetin amerikan, dhe i bëri thirrje amerikanëve të ndjekin paralajmërimin.
Cunami mund të arrijë deri në bregdetin lindor të Rusisë, raporton agjencia “RIA Novosti”.
Valët e para përfshinë arkipelagun e Gambisë, dhe pastaj brigjet e Tahitit, qendra sizmologjike e të cilët, megjithatë njoftoi se valët ishin të lartë rreth 36 centimetra. Siç pritet, cunami së shpejti do të arrijë edhe te ishujt Bora Bora, raporton Reuters.
Ekspertët paralajmërojnë se cunami vjen me valë të shumta dhe valët e para nuk do të thotë të jenë më të lartat. Paralajmërimi për cunami është lëshuar në vendet e Paqësorit, nga Zelanda e Re deri në Kili. Në Kaliforni dhe në ishujt e Paqësorit Havai, Samoa Amerikane dhe Samoa janë lëshuar paralajmërimet nga rreziku prej cunamit.
Të paktën pesë persona janë vrarë dhe 11 janë zhdukur në ishujt Robinson Cruzo, në pjesën jugore të Paqësorit nga cunami i shkaktuar pas tërmetit të fuqishëm.
Autoritetet lokale theksuan se një seri valësh të cunamit kanë goditur brigjet e ishullit, i cili ka rreth 600 banorë.