Shkencëtarët prezantojnë tepihun fluturues

Tepihu i parë në miniaturë, i krijuar nga plastika, ka fluturuar në laboratorin e Universitetit Prinston, me ndihmën e valëve elektrike.

Bëhet fjalë për një fletë të plastikës së “mençur”, në gjatësi prej dhjetë centimetrash, e cila vihet në lëvizje nga valët elektrike duke dërguar përgjatë anës së poshtme “xhepa” ajri, njoftojnë mediat britanike.

Prototipi, i përshkruar në revistën “Analet e fizikës së aplikuar”, lëviz me shpejtësinë prej rreth një centimetër në sekondë, ndërsa me dizajnin e avancuar do të mund të arrijë shpejtësinë prej një metër në sekondë.

Krijuesi i kësaj pajisjeje, i cili më tepër ngjason me rrëfimet nga 1001 net se sa nga inxhinieria e shekullit 21, është studenti i diplomuar Noa Xhaferis.

Prototipi tash për tash ka rreze-veprim të kufizuar, pasi që është i lidhur me bateria të mëdha, ashtu që mund ta lëvizë vetëm disa centimetra.

Shkencëtari i ri ka shpjeguar se është duke punuar në modelin e avancuar, i cili do të lëvizë me energji diellore, dhe si i tillë do të mund të fluturojë lirisht në lartësi më të mëdha.