Eto, gati një rikthim i bujshëm tek Interi

nga **Durrsaku** Thu 13 Oct 2011 - 3:08

TIRANE-Një telefonatë mes Samuel Eto dhe presidentit të Interit Masimo Morati, ka ndezur fantazinë e tifozëve zikaltër. “President, si thoni nëse kthehem tek Interi në muajt që kampionati rus është i ndërprerë?”, ka thënë kamerunasi. “Për mua edhe mund të bëhet”, ka qenë përgjigja e Moratit, që ende gëzon vlerësimin më të lartë për Eto. Thënë ndryshe, bazat për ta parë Eto sërish me fanelën e Interit, ekzistojnë. Zikaltërit kanë dy vende të lira për ekstrakomunitarët dhe mund të marrin Eto në huazim për muajt janar e shkurt, duke i paguar një pjesë të rrogës që ai merr tek Anzhi. Bëhet fjalë për një operacion të ngjashëm me atë që çoi Devid Bekham tek Milani. Për momentin gjithçka ka ndaluar te telefonata, por në muajt e ardhshëm, të gjithë presin zhvillime interesante. Largimi i Samuel Eto u shoqërua me një krizë tek Interi, që e ka nisur mjaft keq kampionatin. Kamerunasi ishte lojtari më në formë i sezonit të shkuar, i aftë të bëjë i vetëm një repart. Ndërkaq, Interi do të ndeshet të shtunën ndaj Katanias, por për trajnerin Klaudio Ranieri është shtuar edhe një tjetër mungesë, ajo e Diego Forlan. Zhulio Sezar e Shnajder ndërkohë duken më mirë.

(d.b/BalkanWeb)