Do të dobësohesh? Përtypu me ngadalë

Fjalët e urta popullore shpesh herë na acarojnë. Kur mamaja na thoshte
të përtypeshim me ngadalë për të ndihmuar tretjen, të paktën 20 herë për
cdo kafshatë, nuk po na detyronte të bënim një ushtrim të kotë, por po
na ndihmonte të mbanim nën kontroll peshën.


Kjo, sepse fjala e urtë “po
të hash me ngadalë dobësohesh” është e vërtetë. Këtë e kanë treguar dy
kërkime shkencore të bëra dhe të prezantuara në kongresin vjetor të
Shoqatës së Obezitetit në Shtetet e Bashkuara.

Specialistja e
ushqimit Kathleen Melanson ka kryer dy kërkime të ndryshme për të
zbuluar nëse shpejtësia me të cilën hamë ka lidhje me mundësinë për t’u
dobësuar, ose për të mbajtur nën kontroll peshën.


Eksperimenti i parë, vlerësimi i shpejtësisë me të cilën konsumohen
ushqimet dhe lidhja me sasinë e gëlltitur ka dhënë këtë rezultat:

Ngrënësit e shpejtë gëlltisin mesatarisht 88 gramë ushqime në minutë,
kundrejt 70 gramëve që gëlltisin ngrënësit e mesëm dhe 57 gramëve që
gëlltisin personat që përtypen me ngadalë.

“Burrat janë
mesatarisht më të shpejtë krahasuar me femrat dhe konsumojnë rreth 80
kalori në minutë, kundrejt 52 kalorive të femrave. Faktikisht, burrat që
hanë më ngadalë e kapërcejnë ushqimin me një shpejtësi të barabartë me
atë të grave që përtypen shpejtë”, ka deklaruar Melanson.

Në
eksperimentin e dytë, studiuesja është përpjekur të zbulojë nëse
shpejtësia me të cilën gëlltitet një vakt është e lidhur me treguesin e
masës trupore, domethënë me gradën e mbipeshës. Përgjigjia ka qenë “po”.


“Një tregues i masës trupore më i lartë lidhet në mënyrë të
pashmangshme me tendencën për të ngrënë më shpejt. Kam menduar edhe se
shpejtësia për të gëlltitur ushqimin është e lidhur me një nevojë më të
madhe për energji, duke qenë se burrat dhe subjektet në mbipeshë kanë
kërkesa më të larta për energji. Por është e vështirë të kuptohet se
cili është raporti real shkak-pasojë”, ka shtuar studiuesja./TCh/

Eshte mese e vertete,por njerezit ndonjehere hane shume shpesh pasi nuk u del koha dhe kane pune te tjera.