Block: Artistët kosovarë janë në rrugë të mirë

Ka një gjysmë shekulli që ai ka kapërcyer sfidat e menaxhimit të galerive private. Me përvojën që përvetësoi nga puna në Berlin e New York, ai nisi të punojë si kurator i pavarur. Rene Block (69) ende vazhdon të jetë në “gjah” të artit. Suksesi i ekspozitave e bienaleve të mëdha botërore është vulosur me emrin e tij, por rrugëtimi në botën e arteve pamore nuk ka marrë fund. Kuratori i njohur gjerman së fundi ka vizituar Kosovën për të tretën herë. Në “misionin” e tij ai ka përmbledhur veprat e 58 artistëve me renome ndërkombëtare, duke prezantuar punën 20-vjeçare të tyre. Në një bisedë për “Kohën Ditore”, Block ka rrëfyer për eksperiencën e tij në fushën e arteve pamore dhe lidhjen që ka me artistët kosovarë. Kujtimet e tij nga kryeqyteti kanë mbetur të “paprekura” dhe Block nuk heziton të komentojë përshtypjen që ka për skenën artistike të Kosovës. Kuratori me nam – i cili prej 1982 deri më 1992 ishte në krye të artistëve dhe kompozuesve në Berlin e më vonë, disa herë drejtor artistik i disa bienaleve si ajo në Hamburg më 1985, Sydney (1990), Stamboll (1995) Pavijonit Nordik në Bienalen e Venecias e shumë të tjera – duket tepër optimist për artistët kosovarë. E për ta dëshmuar këtë Block ka bërë edhe një premtim.